जिल्ह्यातील ४८४९ विद्यार्थ्यांचा सर्व्हेक्षणामध्ये समावेश

सर्व व्यवस्थापनाच्या व सर्व माध्यमाच्या शाळा होणार सहभागी

मसुरे | सौ.प्राजक्ता पेडणेकर : राष्ट्रीय संपादणूक सर्वेक्षण हे १२ नोव्हेंबरला संपूर्ण देशात एकाच वेळी प्रस्तावित असून जिल्ह्यातील १६२ शाळांचा समावेश या सर्वेक्षणामध्ये होणार असल्याची माहिती डाएट प्राचार्य श्रीम. अनुपमा तावशीकर यांनी दिली आहे.
या राष्ट्रीय संपादणूक सर्वेक्षणामध्ये जिल्ह्यातील १६२ शाळांमधील २११ वर्ग समाविष्ट असून इयत्ता तिसरीमधून ९२३, पाचवीमधून १०१०, आठवीमधून १३७६ व दहावीमधून १५४० अशा एकूण ४८४९ विद्यार्थ्यांचा समावेश या सर्वेक्षणामध्ये होणार आहे.
यासाठी इयत्ता तिसरीसाठी भाषा, गणित व पर्यावरण अभ्यास, पाचवीसाठी भाषा, गणित व पर्यावरण अभ्यास, आठवीसाठी भाषा, गणित, विज्ञान व सामा.शास्त्रे व दहावीसाठी भाषा (मराठी/उर्दू/हिंदी इ.), गणित, विज्ञान, सामा.शास्त्रे व इंग्रजी या विषयांचा समावेश केला जाणार आहे.
या सर्वेक्षणामध्ये सर्व व्यवस्थापनाच्या व सर्व माध्यमाच्या शाळांचा समावेश होणार असून त्यासाठी राष्ट्रीय स्तरावरून यादृच्छिक नमुना निवड पद्धतीने शाळा, वर्ग व विद्यार्थी यांची निवड केली जाणार आहे. सदर शाळांची यादी दोन दिवस अगोदर समजणार असल्यामुळे प्रत्येक शाळेने राष्ट्रीय संपादणूक सर्वेक्षणाच्या तयारीला लागावे असे आवाहन डाएट प्राचार्य श्रीम. अनुपमा तावशीकर यांनी केले आहे.
सिंधुदुर्ग जिल्हा हा गुणवत्तेमध्ये नेहमीच पुढे असून, २०१७ साली झालेल्या राष्ट्रीय संपादणूक सर्वेक्षणामध्ये सिंधुदुर्ग जिल्हा राज्यामध्ये अग्रेसर राहिलेला आहे. यावेळीही शाळांनी विद्यार्थी – पालक यांना सर्वेक्षणाची माहिती द्यावी, सुनियोजित कामकाज करावे व केलेल्या नियोजनाप्रमाणे तयारी करवून घ्यावी असे आवाहन त्यांनी केले आहे. त्यासाठी डाएट व जिल्हा परिषद शिक्षण विभागाच्या वतीने रोजची अभ्यासमाला, सराव परीक्षा, शिक्षक, केंद्रप्रमुख, साधन व्यक्ती कार्यशाळा नियोजित केले गेले असल्याची माहिती त्यांनी दिली.