मालवण | ब्यूरो न्यूज : छत्रपती शिवाजी महाराज यांच्या मालवण येथील किल्ले राजकोट मधल्या पूर्णाकृती पुतळ्याचे दर्शन व पूजन सोहळा राज्याचे मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या हस्ते ११ मे रोजी संपन्न झाला. जवळपास ९१ फूट उंची असलेला छत्रपती शिवरायांचा हा पूर्णाकृती पुतळा देशातील सर्वांत उंच पुतळ्यांपैकी एक आहे.

पूजन झाल्यानंतर शिव आरती करण्यात आली. महाराजांच्या जयघोषाने राजकोट परिसर दणाणून गेला. यावेळी शिल्पकार अनिल सुतार, सार्वजनिक बांधकाम विभागाचे कार्यकारी अभियंता महेंद्र किणी, अधिक्षक अभियंता मिलिंद कुलकर्णी, अजित पाटील यांचा मुख्यमंत्र्यांच्या हस्ते सन्मान करण्यात आला.

छत्रपतींच्या पुतळ्या बरोबरच पर्यटकांना, शिवप्रेमींना याची भव्यता पाहता यावी, छत्रपतींच्या कार्याचा अनुभव यावा यासाठी परिसराचा भागही शिवसृष्टी म्हणून विकसित केला जाणार आहे, अशी ग्वाही राज्याचे मुख्यमंत्री देवेंद्र फडणवीस यांनी दिली.

यावेळी उपमुख्यमंत्री एकनाथ शिंदे, राज्याचे माजी मुख्यमंत्री तथा माजी केंद्रीय मंत्री, विद्यमान खासदार नारायण राणे, पालकमंत्री नितेश राणे, सार्वजनिक बांधकाम मंत्री शिवेंद्रराजे भोसले, भाजपा प्रदेश कार्यकारी अध्यक्ष रवींद्र चव्हाण, माजी मंत्री आमदार दीपक केसरकर, कुडाळ मालवण विधानसभा आमदार निलेश राणे, आमदार कालिदास कोळंबकर, आमदार निरंजन डावखरे, रविंद्र फाटक, भाजपा जिल्हाध्यक्ष प्रभाकर सावंत, शिवसेना जिल्हाप्रमुख दत्ता सामंत, राष्ट्रवादी काँग्रेस जिल्हाध्यक्ष अबिद नाईक, काका कुडाळकर, शिल्पकार अनिल सुतार, तहसीलदार वर्षा झाल्टे यांच्यासह महायुतीचे पदाधिकारी व शिवभक्त उपस्थित होते.