मालवण /सुयोग पंडित: मालवण तालुका उत्तर विभाग शिक्षण साहाय्यक समिती संचालित, ओझर विद्यामंदिर कांदळगाव या प्रशालेमध्ये ‘एक राखी सैनिकांसाठी’ हा उपक्रम राबवून देशाच्या रक्षणासाठी सदैव तत्पर असलेल्या जवानांना विद्यार्थिनींनी पोस्टाद्वारे राख्या पाठवून सैनिकांप्रती असलेला आदर द्विगुणीत केला. ओझर विद्यामंदिरच्या विद्यार्थिनींनी तयार केलेल्या राख्या भारतीय लष्कर प्रमुख अधिकारी, लष्कर मुख्यालय, श्रीनगर विभाग, जम्मू आणि काश्मीर सर्कल येथे पाठविण्यात आल्या. हा उपक्रम प्रशालेमध्ये दरवर्षी राबविण्यात येतो. सैनिकांना आपण प्रत्यक्ष भेटू शकत नाही; परंतु या उपक्रमातून सैनिकांना आत्मीयतेचा संदेश पाठवून सैनिकांबद्दल असलेले प्रेम आणि आदराची भावना व्यक्त करू शकतो. विद्यार्थ्यांच्या मनामध्ये देशप्रेम, राष्ट्रभक्ती, सर्वधर्मसमभाव इत्यादी भावना रुजू होण्यासाठी अशा प्रकारचे अनेक उपक्रम ओझर विद्यामंदिरमध्ये राबविण्यात येतात. ‘एक राखी सैनिकांसाठी’ हा उपक्रम प्रशालेमध्ये राबविण्यासाठी प्रशालेचे शिक्षक प्रवीण पारकर आणि सौ. एस. एस. बांदिवडेकर यांनी नियोजन करून विद्यार्थिनींना राख्या तयार करण्यासाठी मार्गदर्शन केले. ओझर विद्यामंदिरचे सर्व शिक्षक व शिक्षकेतर कर्मचारी यांनीही या उपक्रमासाठी सहकार्य केले. शाळेमध्ये संस्कारक्षम उपक्रम राबविल्याबद्दल ओझर विद्यामंदिरचे मुख्याध्यापक डी. डी. जाधव यांनी उपक्रमात सहभागी झालेल्या विद्यार्थिनींचे आणि मार्गदर्शक शिक्षकांचे अभिनंदन केले.