बांदा /राकेश परब: युवकांनी अभ्यासाचे योग्य नियोजन करून मेहनत केल्यास भविष्याची दिशा उज्वल आहे. आजच्या विद्यार्थ्यांना शिक्षणाच्या सोयी सुविधा पालकांनी चांगल्या देण्याचा प्रयत्न केलेला आहे. तसेच तरुण पिढीही मेहनती आहे. असे प्रतिपादन शिक्षणतज्ञ प्राचार्य श्री.भिकाजी धुरी यांनी व्यक्त केले. ते मडुरा हायस्कूलच्या विद्यार्थी कौतुक सोहळ्यामध्ये बोलत होते. इयत्ता दहावी मार्च २०२३ मध्ये उत्तीर्ण झालेल्या व प्रथम पाच क्रमांक मिळवलेल्या सर्व विद्यार्थ्यांचा व त्यांच्या पालकांचा कौतुक सोहळा आयोजित करण्यात आला. यावेळी शालेय समिती सदस्य प्रकाश गावडे, श्रीकृष्ण भोगले, माधुरी वालावलकर, पालक शिक्षक संघ उपाध्यक्ष श्री उल्हास परब, पाडलोस सरपंच सौ. पेडणेकर, सामाजिक कार्यकर्ते श्री. सुरेश गावडे, माजी उपसरपंच विजय वालावलकर, माजी मुख्याध्यापक श्री दशरथ घाडी, विद्यार्थ्यांचे पालक उपस्थित होते.

या शाळेतील शिक्षकेतर कर्मचारीही विद्यार्थ्यांच्या भविष्यासाठी सामाजिक भावनेने प्रयत्न करतात ही गोष्ट कौतुकास्पद आहे. असे प्रतिपादन श्री.प्रकाश गावडे यांनी केले.

जीवनात प्रत्येक व्यक्तीला आदर देऊन यशस्वी वाटचाल करण्यासाठी नेहमी प्रयत्न करत राहणे हे विद्यार्थ्यांचे कर्तव्य आहे असे मार्गदर्शन श्री.उल्हास परब यांनी केले. सर्व मान्यवरांनी विद्यार्थ्यांच्या उज्वल भविष्यासाठी सदिच्छा व्यक्त केल्या.

सर्वच क्षेत्रांमध्ये मुली आज यशस्वी असताना पहायला मिळतात मुलांची संख्या गुणवंत मध्ये कमी असलेली दिसते याचा विचार मुलांनी करायला हवा व व्यवसाय निवडीसाठी प्रत्येकाने आपली क्षमता लक्षात घेतली पाहिजे व प्रयत्न केले पाहिजेत. असे मार्गदर्शन प्रशालेचे मुख्याध्यापक माननीय श्री सुहास वराडकर सर यांनी केले.

ज्या विद्यार्थ्यांना मध्यम गुण मिळालेले आहेत त्यांनी कौशल्यपूर्ण कोर्सची निवड करून आपले भविष्य स्थिर व उज्वल करावे. असे मार्गदर्शन श्री.दशरथ घाडी यांनी केले.

या कौतुक सोहळ्या वेळी उत्तीर्ण विद्यार्थ्यांनी आपली मनोगत व्यक्त केली तर इयत्ता दहावीतील कुमारी जान्हवी पंडित व कुमारी मयुरी मधुकर गावडे यांनी यशस्वी विद्यार्थ्यांचे अभिनंदन करून पुढील वाटचालीस सदिच्छा व्यक्त केल्या.

विद्यार्थी कौतुक सोहळ्याचे सूत्रसंचालन सौ.जे. डी.सावंत मॅडम यांनी केले तर उपस्थितांचे आभार ग्रंथपाल सौ प्रतिभा चंद्रकांत सावंत यांनी व्यक्त केले.