बांदा / राकेश परब : मडुरा, रोणापाल व इन्सुली येथील ग्रामदैवत श्री देवी माऊली मंदिरात बुधवारी मध्यरात्री अज्ञात चोरट्यांनी चोरीचा प्रयत्न केला. इन्सुली व रोणापाल मंदिरात चोरी करताना दोघे युवक चोरटे सीसीटीव्ही कॅमेर्‍यात कैद झाले आहेत. तिनही ठिकाणी चोरट्यांच्या हाती फारसे काही लागले नाही. बांदा पोलीसात चोरीबाबत फिर्याद नसल्याचे सहाय्यक पोलीस निरीक्षक शामराव काळे यांनी सांगितले.

स्थानिक नागरिकांनी दिलेल्या माहितीनुसार सर्वप्रथम चोरट्यांनी मडुरा माऊली मंदिराच्या मुख्य दरवाजाचे कुलूप तोडून फंडपेटी फोडण्याचा प्रयत्न केला. मात्र त्यात फारशी रोकड नव्हती. त्यानंतर रोणापाल माऊली मंदिरात चोरीचा अयशस्वी प्रयत्न केला. रोणापाल मंदिरात फंडपेटीच नसल्याने चोरट्यांना याठिकाणी काहीच गवसले नाही. हा सर्व प्रकार सीसीटीव्हीत कैद झाला.

त्यानंतर पहाटे ४ वाजण्याच्या सुमारास इन्सुली माऊली मंदिर फोडले. त्यात चोरट्यांच्या हाती काहीच लागले नाही. हा प्रकारही सीसीटीव्हीत कैद झाला आहे. फुटेजमध्ये अंदाजे २० ते २५ वयोगटातील दोघे युवक दिसत आहेत. बांदा पोलीसांनी घटनास्थळी भेट दिली. सीसीटीव्ही फुटेज तपासण्याचे काम सुरु आहे. बांदा पोलीसांसमोर चोरट्याने पकडण्याचे आव्हान आहे.

चोरीच्या तीनही घटनांमध्ये रोकड किंवा मौल्यवान वस्तू चोरीस न गेल्याने पोलीस स्टेशनमध्ये संबंधितांकडून रीतसर तक्रार देण्यात आलेली नाही. रोणापाल व इन्सुली मंदिरातील फुटेज तपासण्याचे काम सुरु आहे. चोरट्यांनी मास्क वापरल्याने चेहरा स्पष्ट दिसत नाही. अन्य पर्याय तपासण्याचे काम सुरु असल्याचे एपीआय काळे यांनी सांगितले. या घटनांनी परिसरात खळबळ उडाली आहे.