विवेक परब | एडिटोरिअल असिस्टंट : यंदा दिवाळी सणाच्या पूर्वी देशातील जनतेला एक खाद्य दिलासा मिळण्याची शक्यता आहे. देशात खाद्य तेलाच्या किमतीत मोठी घट होणार असल्याची माहिती सूत्रांकडून मिळत आहे. देशात ऑगस्ट महिन्यामध्ये पामतेलाच्या आयातील 87 टक्क्यांनी वाढ झाली आहे. तर सप्टेंबर महिन्याच्या अखेरपर्यंत 10 लाख टन तेल आयात होऊ शकते. जुलै महिन्याच्या तुलनेत देशाने ऑगस्ट महिन्यात ८७ टक्के इतके वाढीव खाद्यतेल आयात केले आहे. गेल्या ११ महिन्यातील ही सर्वोच्च आयात ठरली आहे. आंतरराष्ट्रीय बाजारपेठेत पामतेलाच्या किमतीत ४० टक्क्यांची घट झाली आहे. याचाच लाभ घेत आता भारताने मोठ्या प्रमाणात तेलाची आयात केली असल्याचे समजते.

आंतरराष्ट्रीय बाजारात पामतेलाच्या किंमती 40 टक्क्यांनी घसरल्या आहेत. पामतेलाची किंमत 1800-1900 डॉलर मेट्रिक टनवरून घसरून 1000-1100 डॉलर मेट्रिक टन वर पोहोचली आहे. ऑगस्ट महिन्यात देशात 9,94,997 टन पामतेल आयात करण्यात आलं. त्याच्या तुलनेनं जुलै महिन्यात 5,30,420 टन पामतेल आयात करण्यात आलं होतं. हे प्रमाण 87 टक्क्यांनी वाढलं. तर सप्टेंबर महिन्यात देशात 10 लाख टन तेल आयात केलं जाऊ शकते.
पामतेल इतर खाद्यतेलांच्या मानाने स्वस्त किंमतीला उपलब्ध असल्याने तेल कंपन्यांनी अधिक पामतेल आयात केले आहे. देशात आता सणांचा मोठा कालावधी सुरु झाला आहे. काही दिवसांवर दिपावलीचा सण आहे. अशा परिस्थितीत पामतेलाची मागणी वाढू शकते. त्यामुळे पामतेलाची आयात वाढली असून आगामी काळात इतर सर्व खाद्यतेलांच्या किंमती स्वस्त होण्याची शक्यता आहे असा अर्थ व बाजारतज्ञांचा अंदाज आहे.