बांदा |राकेश परब :
छत्रपती शिवाजी महाराज यांचे विचार हे आताच्या पिढीला देणे हे खुप गरजेचे आहे. विचारांचे वहन करण्यासाठी शाळा पातळीवर विद्यार्थ्यांना ज्ञान देणे आवश्यक आहे. छोट्या छोट्या नाटिकामधून विद्यार्थ्यांना छत्रपतींचे विचार देऊन प्रेरित करा. तरच खऱ्या अर्थाने महाराजांचे कार्य व विचार हे प्रत्येकाच्या मनामानात व घराघरात पोहोचतील असे प्रतिपादन ज्येष्ठ सिने अभिनेते अनिल गवस यांनी येथे केले.

येथील शिवतेज सेवा संस्थेच्या वतीने बांदा येथे आयोजित शिवराज्याभिषेक दिन सोहळ्यात श्री गवस प्रमुख वक्ते म्हणून बोलत होते. यावेळी पुरोहितांच्या मार्गदर्शनाखाली पारंपारिक व धार्मिक पद्धतीने सावंतवाडी संस्थांनाचे युवराज लखमराजे भोसले यांच्या हस्ते शिवराज्याभिषेक करण्यात आला. मान्यवरांच्या हस्ते दीपप्रज्वलन करून कार्यक्रमाची सुरुवात करण्यात आली. यावेळी अनिल गवस यांनी उपस्थिताना शिवविचारांवर मार्गदर्शन केले. त्यांनी इतिहासातील विविध विषयांचे, छत्रपती शिवाजी महाराजांच्या विविध पैलुंचे, त्यांच्यातील उत्कृष्ट व्यवस्थापनाचे दाखले यावेळी दिलेत.
छत्रपती शिवाजी महाराज हे उत्कृष्ट शासक
छत्रपती शिवाजी महाराज हे रायतेचे राजे होते. ते उत्कृष्ट शासक तर होतेच. मात्र रायतेच्या मनातील जाणणारे जाणते राजा होते. त्यांच्या कार्यपद्धतीमुळेच स्वराज्याचा विस्तार झाला. त्यांचे कार्य व विचार आताच्या पिढीने आत्मसात करणे गरजेचे असल्याचे युवराज लखमराजे भोसले यांनी सांगितले.
. कार्यक्रमाचे प्रात्ताविक भूषण सावंत यांनी केले. सूत्रसंचालन रीना मोरजकर यांनी केले तर आभार समीर परब यांनी मानले. यावेळी ज्येष्ठ नागरिक संघांचे अध्यक्ष अन्वर खान, केंद्रप्रमुख संदीप गवस, मुख्याध्यापक श्रीकांत आजगावकर, संस्थेचे अध्यक्ष ऍड विठ्ठल परब, सचिव अनुज बांदेकर, उपाध्यक्ष तेजस परब, निलेश मोरजकर, केदार कणबर्गी, प्रशांत गवस, प्रथमेश राणे, अक्षय मयेकर, संकेत वेंगुर्लेकर, संतोष मंझिलकर, जयेश म्हाडगूत, निलेश सावंत, निखिल तानावडे, अजय आरोसकर, रंगनाथ परब, सरोज नाईक, उर्मिला मोर्ये, शुभेच्छा सावंत, दिक्षा गवस, आर्या पवार आदी उपस्थित होते.