वास्तु पुजा, प्रतिष्ठा होम, रक्षोज्ञा होम आदी विधींनी मुर्तीची प्राणप्रतिष्ठापना

मसुरे | प्राजक्ता पेडणेकर : श्री स्वामी समर्थांचे मूळस्थान असलेल्या अक्कलकोट येथील श्री वटवृक्ष स्वामी महाराज देवस्थानच्या वातानुकूलित गाभारा मंडपाचे व गर्भगृहाचे काम पुर्ण झाल्यानंतर नियोजीत धार्मिक विधीनुसार मुर्ती प्रतिष्ठापना धार्मिक विधी सुरू झाले आहेत. मंदीर समितीचे चेअरमन महेश इंगळे, सचिव आत्माराम घाटगे व विश्वस्त मंडळ यांच्या प्रमुख उपस्थितीत वास्तु पुजा, प्रतिष्ठा होम, रक्षोज्ञा होम आदी विधी मंदिर समितीचे पुरोहीत मोहनराव पुजारी यांच्या अधिपत्याखाली, मंदार मोहनराव पुजारी व सौ.मुग्धा मंदार पुजारी यांच्या हस्ते कर्नाटकच्या उडपी येथील राघवेंद्र भट, श्रीधर भट, दिनेश भट, प्रसन्ना भट, कृष्णा भट, सुब्रमण्यम भट आदींसह स्थानिक ब्रह्मवृंद यांच्या विधिवत मंत्रोच्चारात व सनईच्या मंजूळ स्वरात संपन्न झाल्या. यानंतर वटवृक्ष मंदिरातील श्री स्वामी समर्थांच्या मुळ गाभाऱ्यात महेश इंगळे, विश्वस्त मंडळ, व मंदीर सेवेकरी, कर्मचारी यांच्या उपस्थितीत पुरोहीत मोहन पुजारी, मंदार पुजारी व ब्रम्हवृंद यांच्या विधीवत गोपुजेने व गाभारा गो प्रवेशाने गाभार्‍यातील स्थान शुद्धीकरण करण्यात आले. यावेळी वास्तु पुजा, प्रतिष्ठा होम, रक्षोज्ञा होम आधी विधी वटवृक्ष मंदिरातील संपन्न होणाऱ्या ठिकाणी आकर्षक फुलांची सजावट करण्यात आली होती तसेच मंदिर परिसरात विद्युत रोषणाई करण्यात आल्याने सनईच्या मंजूळ स्वर आविष्काराने अत्यंत मंगलमय प्रसन्नपूर्वक भक्तिमय वातावरणातील हा सोहळा उपस्थित भाविक याची देही याची डोळा अनुभवून धन्य झाले. यावेळी मंदिर समितीचे सचिव आत्माराम घाटगे, विश्वस्त महेश गोगी, जनार्दन होळळा, अक्षय सरदेशमुख, श्रीपाद सरदेशमुख, मनोहर देगावकर, महेश घिवारे, संजय पवार, प्रसाद सोनार, श्रीशैल गवंडी, गिरीश पवार, विपुल जाधव, ऋषिकेश लोणारी, स्वामीनाथ लोणारी, पवन पवार, महेश मस्कले, लखन गवळी, चन्ना विभूते, सागर गोंडाळ, चंद्रकांत कवटगी, रवी मलवे, श्रीकांत मलवे आदींसह अनेक स्वामी भक्त उपस्थित होते.