समजू शकले नाही आत्महत्येचे कारण …!

मसुरे | प्राजक्ता पेडणेकर : सिंधुदुर्ग जिल्ह्यातील मालवण तालुक्यातील चुनवरे गावठणवाडी येथील श्रीकृष्ण दिनेश परब (२९ वर्ष) या युवकाने बुधवारी रात्री गळफास घेत आत्महत्या केल्याच्या घटनेने खळबळ माजली आहे. मालवण येथे स्कुबा डायव्हर म्हणून काम करणारा श्रीकृष्ण हा बुधवारी सायंकाळी चार वाजता मालवण येथून आला होता. रात्री नऊ नंतर घराबाहेर पडल्यानंतर साडे अकरा वाजेपर्यंत तो दिसून न आल्यामुळे शोधाशोध केली असता घराच्या मागील बाजूस असलेल्या रातांब्याच्या झाडाला दोरीच्या साह्याने गळफास घेतलेल्या स्थितीत तो दिसून आला. मसुरे पोलिसांना याबाबत घटनेची फिर्याद त्याचा भाऊ अभय दिनेश परब यांनी दिली.
मसुरे पोलीस पी.बी. नाईक व विवेक फरांदे यांनी त्वरित घटनास्थळी धाव घेत मृतदेह शवविच्छेदनासाठी मसुरे प्राथमिक आरोग्य केंद्र येथे आणला. गुरुवारी सकाळी शवविच्छेदन झाल्यानंतर मृतदेहावर अंतिम संस्कार चुनवरे येथे करण्यात आले. श्रीकृष्ण परब हा अविवाहित होता. त्याच्या पश्चात आई-वडील, भाऊ असा परिवार आहे. मालवण पोलीस स्थानकाचे एपीआय एस. एस. चव्हाण यांनी घटनास्थळी भेट दिली आत्महत्येचे नेमके कारण समजू शकले नाही. अधिक तपास मालवण पोलीस अधीक्षक एस एस ओटवणेकर यांच्या मार्गदर्शनाखाली मसुरे पोलीस स्थानकाचे पी. बी नाईक व विवेक फरांदे करत आहेत