तहसीलदार अजय पाटणे यांचे प्रतिपादन वडाचापाट येथे उत्पन्न देणाऱ्या वृक्षांच्या रोपांचे वाटप

मसुरे | प्राजक्ता पेडणेकर : आज ग्लोबल वॉर्मिंगची समस्या जटिल बनत असल्याने वृक्ष संवर्धन ही काळाची गरज बनली आहे. पर्यावरणाचे संतुलन राखण्यासाठी वृक्षाचे संगोपन करणे ही महत्त्वाची बाब असून गेली काही वर्षे वडाचापाट येथील श्री देवी शांतादुर्गा हायस्कूल हे वडाचापाट गाव आणि पंचक्रोशीतील शेतकऱ्यांना उत्पन्न देणाऱ्या वृक्षाचे वाटप करून एक स्तुत्य उपक्रम राबवित आहे. अशा प्रकारच्या उपक्रमातून या भागात रोजगारातून हरितक्रांती घडेल असा विश्वास मालवणचे तहसीलदार श्री. अजय पाटणे यांनी येथे बोलताना व्यक्त केला. वडाचापाट येथील श्री देवी शांतादुर्गा हायस्कूल येथे महिंद्रा फायनान्स यांच्या सहयोगातून ग्रामस्थांना नारळ, काजू, जायफळ, मिरी या वृक्षांचे वाटप करण्यात आले. त्यावेळी तहसीलदार श्री. पाटणे हे बोलत होते. यावेळी व्यासपीठावर प्रमुख पाहुणे म्हणून मुळदे येथील उद्यान विद्या महाविद्यालयाचे सहयोगी अधिष्ठाता डॉ. प्रदीप हळदवणेकर, भंडारी एज्यु. सोसायटी (मालवण) मुंबईचे ऑनररी जनरल सेक्रेटरी साबाजी करलकर, संस्थेचे चेअरमन सुधीर हेरेकर, प्रशालेचे मुख्याध्यापक जे. एन. पाटील, भंडारी ए. सो. हायस्कूल चे मुख्याध्यापक व्ही. जी. खोत, माजी मुख्याध्यापिका सौ. सुप्रिया टिकम, श्री. आंगणे सर आदी व इतर उपस्थित होते. प्रारंभी जे. एन. पाटील यांनी उपस्थितांचे स्वागत करून प्रास्ताविक केले. यावेळी बोलताना तहसीलदार अजय पाटणे यांनी पूर्वी शाळा शाळांमधून स्काऊट गाईडचे शिक्षण दिले जात होते त्यात खरी कमाई हा भाग होता. या खरी कमाईतून विद्यार्थ्यांना उपजीविकेचे साधन कसे निर्माण करायचे याचे जणू शिक्षण दिले जात होते. आज पुस्तकी ज्ञानाबरोबरच व्यावसायिक ज्ञान आवश्यक असून व्यावसायिक ज्ञानाचे धडे आय बी टी च्या माध्यमातून ही शाळा राबवत आहे. विद्यार्थ्यांना भविष्य काळात या व्यावसायिक शिक्षणाचा निश्चितपणे लाभ होईल असे ते म्हणाले. तर श्री. प्रदीप हळदवणेकर यांनी प्रगत कृषी ज्ञानाची माहिती देतानाच विद्यार्थ्यांना मार्केटिंगचे महत्त्व पटवून सांगितले. या कार्यक्रमासाठी संस्थेचे अध्यक्ष श्री विजय पाटकर यांचे विशेष मार्गदर्शन लाभले यावेळी संस्थेचे ऑनररी जनरल सेक्रेटरी साबाजी करलकर, चेअरमन सुधीर हेरेकर यांची समयोचित भाषणे झाली. यावेळी मान्यवरांचा शाल श्रीफळ देऊन सत्कार करण्यात आला. शेवटी वेदिका दळवी यांनी आभार मानले तर प्रसाद कुबल यांनी कार्यक्रमाचे सूत्रसंचालन केले. कार्यक्रमाच्या यशस्वीततेसाठी सहाय्यक शिक्षिका प्रतिभा केळुसकर, पी पी सनये,भाऊ भोगले, कविता माडये, हर्षदा पाटकर , जगन्नाथ आंगणे, श्री महेश गावडे, शिपाई गुरुदास हडकर, वासंती वरक यांनी अथक परिश्रम घेतले