अनियमित वीज पुरवठ्याबद्दल अधिकार्यांना विचारला जाब..!

चिंदर | विवेक परब : आचरा येथील विजेच्या खेळखंडोब्याने आचरावासीय त्रस्त आहेत.
गेले काही दिवस अनियमित होणाऱ्या विज पुरवठ्यामुळे व्यापारी वर्गाला त्रास सहन करावा लागत आहे. यामुळे संतप्त व्यापाऱ्यांनी आचरा विद्युतमंडळाच्ये कार्यालयावरच थेट जाऊन अधिकाऱ्यांकडे कारणमिमांसा करत त्यांना फैलावर घेतले. याबाबत आचरा सबस्टेशन फिडरमध्ये झालेल्या बिघाडामुळे विद्यूत समस्या उद्भवत असून शनिवारी आवश्यक ते सामान उपलब्ध झाल्यावर बिघाड दुरुस्त करण्यात येणार असल्याचे अभियंता पाटील यांच्या कडून स्पष्ट करण्यात आले. याबाबत समस्या दूर न झाल्यास आक्रमक पवित्रा घेण्याचा इशारा व्यापारी वर्गाकडून देण्यात आला आहे.
दिवाळीपासूनच आचरा येथे विजेचा लपंडाव सुरू झाला आहे. मागील रविवारी ऐन आठवडा बाजारा दिवशीच वीज पुरवठा खंडित झाला होता.तरीही व्यापारी वर्गाने संयमाने घेत विद्युत मंडळाविरोधात सामंजस्याची भावना घेतली होती. मात्र तरीही खंडित वीजेचा त्रास सुरुच राहिल्याने संतप्त आचरा व्यापारी वर्गाने जिल्हा परिषद सदस्य जेराँन फर्नांडिस, संघटनेचे अध्यक्ष अर्जुन बापर्डेकर, जयप्रकाश परुळेकर यांच्या मार्गदर्शनाखाली गुरुवारी सकाळी विद्युत मंडळ कार्यालयावर धडक देत येथील सहाय्यक अभियंता पाटील यांना जाब विचारला. या वेळी त्यांच्या सोबत व्यापारी संघटनेचे प्रफुल्ल नलावडे, प्रफुल्ल घाडी,चंदू कदम, निखिल ढेकणे, पंकज आचरेकर, दाजी आचरेकर, सागर राठवड,गोसावी, शरद देसाई,अवी परब,यांसह अन्य व्यापारी आदी उपस्थित होते. यावेळी उपस्थित व्यापारी पदाधिकारयांनी आचरा बाजारपेठ लाईनला नेहमी उद्भवणाऱ्या समस्यांचा पाढाच वीज मंडळ अधिका-यांसमोर वाचून तातडीने समस्या दूर करण्याची मागणी केली. यात आचरा बाजारपेठेसाठी वेगळ्या जनित्राची व्यवस्था करणे, आचरा बाजारपेठ देवूळवाडी येथील गंजलेल्या जनित्रामुळे कर्मचारी, ग्रामस्थांना असलेला धोका , कामासाठी बाजारपेठेतील लाईन बंद करताना दुपारी मधल्या वेळेत केली जावी, वीज थकबाकी बिलाबाबत वीज जोडणी तोडण्याची कारवाई करण्याअगोदर संबंधित ग्राहकांना कल्पना देणे आदी बाबींबाबत ववीजमंडळ अधिकारयांना सजग करण्यात आले. याबाबत सहाय्यक अभियंता पाटील यांनी या बाबत पाठपुरावा सुरू केला असून सध्या उद्भवत असलेली समस्या ही आचरा सबस्टेशन फिडर मध्ये बिघाडामुळे निर्माण झाली असून शनिवारपर्यंत ती दुरुस्त केली जाणार असल्याचे सांगितले.