'वीर सावरकर जागर' प्रदर्शनाला नागरिकांचा उत्स्फूर्त प्रतिसाद.

स्वातंत्र्यवीर सावरकर विचार प्रचार विभाग' अध्यक्ष अरविंद प्रभू, कार्याध्यक्ष सुभाष पेठे, कार्यवाह केशव परांजपे, कोषाध्यक्ष विनायक जोशी तसेच उद्योजक डाॅ. दीपक परब व संजय सावंत यांच्या परिश्रमातून आयोजित प्रकल्प.

​मसुरे | प्रतिनिधी : अंदमानच्या ऐतिहासिक सेल्युलर जेलमधील आठवणी आणि स्वातंत्र्यवीर सावरकरांच्या त्यागाची गाथा सध्या मुंबईकरांना, विलेपार्लेकरांना अनुभवता येत आहे. स्वातंत्र्यवीर सावरकर विचार प्रचार विभागातर्फे विलेपार्ले (पूर्व) येथील स्वातंत्र्यवीर सावरकर सेवा केंद्रात १ नोव्हेंबर ते २२ नोव्हेंबर २०२६ या कालावधीत 'वीर सावरकर जागर' या विशेष प्रदर्शनाचे आयोजन करण्यात आले आहे. हे प्रदर्शन सर्व नागरिकांसाठी खुले असून त्याला उत्स्फूर्त प्रतिसाद मिळत आहे.

१ नोव्हेंबर रोजी या प्रकल्पाचे उद्घाटन करण्यात आले. याच दिवशी आयोजित किल्ला कार्यशाळेत लहानग्यांपासून मोठ्यांपर्यंत सर्वांनी उत्स्फूर्त सहभाग घेत किल्ले साकारले. २ ते २२ नोव्हेंबर दरम्यान हे प्रदर्शन सर्वांच्या भेटीसाठी उपलब्ध आहे.

​तरुण कलाकारांसाठी पोस्टर मेकिंग स्पर्धा.

जागराच्या समारोपाच्या दिवशी, म्हणजेच २२ नोव्हेंबर २०२६ रोजी स्वातंत्र्यवीर सावरकरांचे विचार आणि जीवन यावर आधारित पोस्टर मेकिंग स्पर्धा आयोजित करण्यात आली आहे.

​१० ते १८ वर्षे हा पहिला गट असून १९ वर्षे आणि त्यावरील स्पर्धकांचा दुसरा गट आहे.

​या स्पर्धेतील दोन्ही गटांतील विजेत्यांना आकर्षक रोख पारितोषिक आणि चषक देऊन सन्मानित करण्यात येणार आहे. विद्यार्थ्यांनी आणि तरुण कलाकारांनी या स्पर्धेत मोठ्या संख्येने सहभागी व्हावे, असे आवाहन आयोजकांतर्फे करण्यात आले आहे.

​माहिती व संपर्कसाठी , 'स्वातंत्र्यवीर सावरकर सेवा केंद्र, एम. जी. रोड, विलेपार्ले (पूर्व)' इथे सायंकाळी ६ वाजल्यापासून भेट देता येईल तर अधिक माहितीसाठी श्री. संजय सावंत ( ९८२०९५९५७२) यांना संपर्क साधता येऊ शकेल अशी माहिती मिळत आहे.

​या प्रकल्पाच्या आयोजनासाठी स्वातंत्र्यवीर सावरकर विचार प्रचार विभागाचे अध्यक्ष श्री. अरविंद रमेश प्रभू, कार्याध्यक्ष श्री. सुभाष वि. पेठे, कार्यवाह श्री. केशव द. परांजपे, कोषाध्यक्ष श्री. विनायक कृ. जोशी तसेच उद्योजक श्री. दीपक परब आणि श्री. संजय सावंत हे विशेष परिश्रम घेत आहेत. मुंबईकर तरुणांनी आणि पार्लेकर नागरिकांनी या प्रदर्शनाला भेट देऊन स्वातंत्र्यवीरांचा हा जागर पुढे नेण्याचे आवाहन आयोजकांनी केले आहे.

​