वसू बारस उत्सवाबाबत श्री गोपाळकृष्ण गोपालक संस्थेच्या वतीने जिल्हा प्रशासनाला निवेदन.

सिंधुदुर्ग : भारतीय संस्कृतीचे प्रतीक असलेल्या गोमातेचे पूजन आणि गोसंवर्धनाचा संदेश समाजातील प्रत्येक घटकापर्यंत पोहोचविण्याच्या उद्देशाने गुरुवार, दिनांक ५ नोव्हेंबर २०२६ रोजी सिंधुदुर्ग जिल्ह्यात वसुबारस उत्सव व्यापक स्वरूपात साजरा करण्यात यावा, यासाठी श्री गोपाळकृष्ण गोपालक संस्थेच्या वतीने जिल्हा प्रशासनाला निवेदन देण्यात आले. भालचंद्र उर्फ बबलू राऊत यांनी याबाबत माहिती दिली आहे. हे निवेदन, सिंधुदुर्ग जिल्हाधिकारी श्रीमती तृप्ती धोडमिसे यांच्याकडे सुपूर्द करण्यात आले तसेच जिल्हा परिषद अध्यक्ष प्रमोद कामत, जिल्हा परिषदेच्या मुख्य कार्यकारी अधिकारी डॉ. अपूर्वा बासूर यांना सादर करण्यात आले.

महाराष्ट्र शासनाने गोमातेला 'राज्यमाता - गोमाता' असा दर्जा दिला असून, गोमातेचे महत्त्व केवळ धार्मिक किंवा भावनिक दृष्टिकोनासोबतच तिचे कृषी, ग्रामीण अर्थव्यवस्था आणि पर्यावरण संवर्धनातील योगदान देखिल समाजापर्यंत पोहोचविणे आवश्यक असल्याचा ह्या निवेदनाचा आशय आहे.

वसुबारस हा केवळ धार्मिक सण म्हणून मर्यादित न राहता तो 'गोसंवर्धनाचा संकल्प दिन' म्हणून साजरा व्हावा अशी संस्थेची भूमिका आहे. यासाठी जिल्ह्यातील सर्व शासकीय व खासगी शाळा, महाविद्यालये, ग्रामपंचायती, नगरपालिका, गोशाळा, गोपालक संघटना आणि सामाजिक संस्थांनी उत्स्फूर्त सहभाग घ्यावा, असे आवाहन जिल्हा प्रशासनाच्या माध्यमातून करण्यात यावे, अशी मागणी करण्यात आली.

विशेषतः शाळा व महाविद्यालयांमध्ये वसुबारस आणि गोसंवर्धन विषयावर जनजागृतीपर कार्यक्रम, निबंध, वक्तृत्व, चित्रकला व घोषवाक्य स्पर्धा आयोजित कराव्यात. विद्यार्थ्यांना स्थानिक गोशाळांना भेट देण्याची संधी द्यावी, गोपालनाचे महत्त्व समजावून सांगावे तसेच देशी गोवंशाचे संवर्धन आणि गोपालकांच्या कार्याचा गौरव करावा, अशा विविध उपक्रमांचे आयोजन करण्याची विनंती निवेदनाद्वारे करण्यात आली आहे.

या वेळी चंद्रशेखर पुनाळेकर, भालचंद्र उर्फ राऊत, गोविंद फणसेकर, रुपाली देसाई, स्नेहल पेडणेकर, दिव्या तळेकर, भार्गवी परब, संदेश बांधकर आणि अनिल वारंग उपस्थित होते.

गोमातेचे रक्षण, गोवंशाचे संवर्धन आणि भारतीय संस्कृतीचे जतन, हाच वसुबारस उत्सवाचा खरा संकल्प या भावनेतून जिल्ह्यात व्यापक जनजागृती निर्माण व्हावी आणि भावी पिढीमध्ये प्राणी मात्रांविषयी प्रेम, दया व करुणेचे संस्कार रुजावेत, हा या उपक्रमामागील मुख्य उद्देश असल्याचेही संस्थेच्या वतीने भालचंद्र उर्फ बबलू राऊत यांनी माध्यमांना स्पष्ट केले आहे.