कट्टा येथे हिरकणी प्रभाग संघ सुकळवाडची वार्षिक सभा संपन्न.       

मसुरे | प्रतिनिधी : मालवण तालुक्यातील हिरकणी प्रभाग संघ सुकळवाडची वार्षिक सभा कट्टा येथे प्रभाग संघ अध्यक्ष मीनल पार्टे यांच्या अध्यक्षतेखाली संपन्न झाली. यावेळी मालवण पंचायत समिती सभापती प्रज्ञा चव्हाण, जिल्हा परिषद सदस्य सुमेधा पाताडे, पंचायत समिती सदस्य श्री. गावडे, तालुका अभियान व्यवस्थापक रविकिरण कांबळे, तालुका व्यवस्थापक साळवे, प्रभाग समन्वयक विरेश पवार, तालुका ब्लॉक अँकर सचिन किर्लोस्कर, प्रभाग सचिव सौ. सीता मेस्त्री उपस्थित होते.

उमेद अभियानाचा मुख्य उद्देश ग्रामीण भागातील गरीब कुटुंबांना, विशेषतः महिलांना स्वयं सहाय्यता समूहांच्या माध्यमातून संघटित करून शाश्वत उपजीविका उपलब्ध करून देणे, आर्थिक आणि सामाजिक समावेशक साधणे आणि त्यांना गरिबीतून बाहेर काढणे हा आहे. प्रभाग संघ ही या संस्थीय रचनेतील महत्त्वाची कडी आहे. आपला प्रभाग संघ मॉडेल संघ होण्यासाठी उद्योग करा, प्रभागाचा जिल्ह्यात नावलौकिक होवो, असे आवाहन सभापती प्रज्ञा चव्हाण यांनी यावेळी केले. यावेळी जि. प. सदस्या सुमेधा पाताडे यांनी प्रत्येक ग्राम संघांना कार्यालय उपलब्ध करून देण्याचे आश्वासन दिले. 

या सभेला ५९० महिला उपस्थित होत्या. प्रास्ताविक सीता मेस्त्री, अहवाल वाचन प्राजक्ता नाईक यांनी केले. सूत्रसंचालन प्रिया पांडुरंग आंगणे यांनी केले.