आंबेरी गावातील श्रमदानाची कमाल, तीन दिवसांत बांधली अडिचशे फूट लांबीची शाळेची कंपाऊंड वाॅल...!

ग्रामपंचायत व गावातील संबंधित बांधकाम कामगारांचे ग्रामस्थ आणि पालकांनी प्रशंसा करत मानले आभार. 

मालवण | ब्यूरो न्यूज : मालवण तालुक्यातील आंबेरी येथील पूर्ण प्राथमिक शाळा क्र. १ च्या सुरक्षेचा प्रश्न मार्गी लावण्यासाठी ग्रामपंचायत व गावातील बांधकाम कामगारांनी एकत्र येत श्रमदानातून शाळेच्या संरक्षक भिंतीचे बांधकाम यशस्वीपणे पूर्ण केले आहे. शाळेच्या सुरक्षिततेच्या दृष्टीने ही संरक्षक भिंत अत्यंत आवश्यक होती. या उपक्रमासाठी ग्रामपंचायतीने पुढाकार घेतला आणि साहित्याची उपलब्धता करून दिली. २२ ते २४ डिसेंबर या अल्प कालावधीत गावातील सर्व बांधकाम कामगारांनी आपल्या कौशल्याचे आणि मेहनतीचे योगदान दिले. या तीन दिवसांच्या कालावधीत सुमारे २५० फूट लांबीच्या भिंतीचे काम पूर्ण करण्यात आले.

आंबेरीतील बांधकाम कामगारांनी स्वेच्छेने आणि कोणत्याही मोबदल्याची अपेक्षा न ठेवता गावातील मुलांच्या सुरक्षिततेसाठी श्रमदान केले असून ग्रामपंचायतीने साहित्याचा पुरवठा करून या कामाला गती दिली.

या नवीन कंपाऊंड वॉलमुळे शाळेचा परिसर आता सुरक्षित झाला असून विद्यार्थ्यांच्या संरक्षणास मोठी मदत होणार आहे. या नाविन्यपूर्ण उपक्रमामुळे शाळेचे बाह्य रूपही बदलले असून परिसराची शिस्त वाढण्यास मदत होईल. गावातील कामगारांनी दाखवलेली ही एकजूट आणि ग्रामपंचायतीचे नियोजन यामुळेच हे अशक्य वाटणारे काम कमी वेळात पूर्ण होऊ शकले, अशा भावना ग्रामस्थांकडून व्यक्त केल्या जात आहेत. आंबेरी परिसरातील पालकवर्ग आणि ग्रामस्थांनी ग्रामपंचायत व सर्व श्रमदान करणाऱ्या कामगारांचे आभार मानले आहेत.