काळसे धामापूर मधील महिनाभर कोलमडलेली दूरध्वनी सेवा २४ तासात सुरळीत..!
निवृत्त उपजिल्हाधिकारी विनोद गोसावी यांच्या पाठपुराव्याला यश.
बी.एस.एन.एल. अधिकारी प्रविण कवडे यांचे बहुमोल सहकार्य.
चौके | अमोल गोसावी : काळसे टेलिफोन एक्सचेंज अंतर्गत असणारी काळसे धामापूर गावातील बीएसएनल ची लॅंडलाईन सेवा सुमारे महिनाभर नादुरुस्त होऊन विस्कळीत झाली होती. जवळपास १२० दूरध्वनी ग्राहक या समस्येमुळे त्रस्त होते.
या असुविधेला काळसे गोसावीवाडीचे सुपुत्र तथा सेवानिवृत्त उपजिल्हाधिकारी विनोद गोसावी यांनी वाचा फोडून ॲक्शन घेण्याच ठरवलं आणि त्याप्रमाणे दोन दिवसात दूरध्वनीमधील समस्या दुर करण्याचं आवाहन करणारं एक निवेदन तयार करून त्यावर दुरध्वनी ग्राहकांच्या सह्या घेऊन सदरचे निवेदन पत्रकार अमोल गोसावी यांच्यामार्फत मालवण तालुक्याचे बी.एस.एन.एल अधिकारी यांच्यापर्यंत २७ ऑक्टोबर रोजी पोहोचवले.
काळसे धामापूर ग्रामस्थांच्या या निवेदनाची तातडीने दखल घेतली ती मालवण येथे नव्यानेच हजर झालेले बी.एस.एन.एल मालवणचे उपविभागीय अभियंता प्रविण कवडे यांनी. प्रविण कवडे यांनी तातडीने २८ ऑक्टोबर रोजी काळसे एक्सचेंज मध्ये आपल्या सहकाऱ्यांसोबत दाखल होत लॅंडलाईन दूरध्वनीमध्ये असणाऱ्या त्रूटी दुर करण्याचे काम हाती घेतले. कवडे यांनी कोल्हापूर उपविभागीय अभियंता प्रशांत पाटील, मालवणचे सहाय्यक अभियंता प्रकाश सरगर आणि काळसे एक्सचेंज चे कर्मचारी राजा सावंत या सहकाऱ्यांसह दिवसरात्र सलग १५ तास काम करून काळसे धामापूर मधील दूरध्वनी ग्राहकांना दिलासा देत लॅंडलाईन फोनला डायल टोन न येणाऱ्या समस्येचे निराकरण केले. आणि अजूनही जर काही त्रूटी राहिल्या असतील तर त्या लवकरच दुर केल्या जातील असेही आश्वासन कवडे यांनी काळसे धामापूर मधील दूरध्वनी ग्राहकांना दिले आहे.
बी.एस.एन.एल अधिकारी प्रविण कवडे यांनी तत्परतेने काम करून ग्राहकांना दिलासा दिल्याबद्दल काळसे धामापूर ग्रामस्थांनी कवडे आणि त्यांच्या सहकाऱ्यांचे आभार व्यक्त केले आहेत.
विभाग:
(आपल्या वेबपोर्टल वरील बातम्या, माहिती, लेखन, छायाचित्रे, जाहीराती व संबंधित मजकूर आणि इतर घटकांच्या विश्वासार्हतेची जबाबदारी आपली सिंधुनगरी न्यूज चॅनेल, प्रतिनिधी, संपादन विभाग तसेच आपली सिंधुनगरी न्यूज चॅनेलची नाही, याची कृपया नोंद घ्यावी.)
