अखिल भारतीय साने गुरुजी कथामाला मालवणचे आदर्श कथामाला पुरस्कार जाहीर.

आचरा | ब्यूरो न्यूज : अखिल भारतीय साने गुरुजी कथामाला मालवण शाखेचे 'आदर्श कथामाला शाखा पुरस्कार' नुकतेच जाहीर झाले. यामध्ये, माध्यमिक विभागातून प्रगत विद्यामंदिर रामगड हायस्कूल आणि प्राथमिक विभागातून आकारी ब्राह्मण विद्यामंदिर, चिंदर बाजार शाळेची निवड झाली आहे. 

आदर्श कथामाला निरीक्षण आणि निवड समितीचे अध्यक्ष सदानंद मनोहर कांबळी यांनी एका पत्रकाद्वारे हा निकाल जाहीर केला आहे. दरवर्षी शाळेमधील आठवडा कथामालेचे नियमित आयोजन, मुलांच्या व्यक्तिमत्त्व विकासासाठी विविध स्पर्धांचे आयोजन, पालक आणि शिक्षक यांचे शाळेसाठी योगदान, शाळेचा शैक्षणिक स्तर उंचावणे अशा निकषांवर सातत्यपूर्ण निरीक्षण करून समिती ही निवड जाहीर करते.

यापूर्वी मालवण, कणकवली, देवगड आदी परिसरातील बारा कथामाला शाखांना हा पुरस्कार लाभला आहे. जानेवारी २०२६ च्या दुसऱ्या आठवड्यात साने गुरुजी कथामालेचे पदाधिकारी संबंधित शाळांमध्ये जाऊन शिक्षक, पालक, विद्यार्थी यांचा गौरव करणार आहेत. स्मृतिचिन्ह, सन्मानपत्र, ग्रंथभेट असे पुरस्काराचे स्वरूप असून शाळेच्या मुख्याध्यापकांसोबत शाळा व्यवस्थापन समिती, माता पालक संघ आणि विद्यार्थीवृंद यांचा गौरव होणार आहे. 

या पुरस्काराबाबत सुरेश शा. ठाकूर (अध्यक्ष, कथामाला मालवण) यांनी दोन्ही कथामालांची प्रशंसा केली असून अभिनंदन केले आहे.