चिपी - मुंबई विमानसेवा सुरू करायच्या प्रक्रियेच्या पालकमंत्री नितेश राणेंकडून सूचना. 

मुंबई | ब्यूरो न्यूज : चिपी - मुंबई विमानसेवा विषयी बुधवार, १७ सप्टेंबर रोजी मंत्रालयात बैठक संपन्न झाली. यावेळी पालकमंत्री नितेश राणे उपस्थित होते. मुंबई - चिपी विमानसेवा सुरू करण्यासाठी लागणाऱ्या परवानग्या आणि त्याची प्रक्रिया लवकरात लवकर पूर्ण करावी. ही विमानसेवा सुरू करण्यासाठी राज्य शासन सकारात्मक असून यासाठी शासनाने उडानच्या धर्तीवर आरसीएस फंडिंगचा निर्णय घेतला आहे. त्यामुळे ही प्रक्रिया तातडीने पूर्ण करावी, अशा सूचना मत्स्य व्यवसाय व बंदरे विकास मंत्री तथा सिंधुदुर्गचे पालकमंत्री नितेश राणे यांनी दिल्या. या बैठकीला विमान वाहतुक सचिव संजय सेठी, विमानतळ प्राधिकरण आणि विमानतळ ऑपरेटर कंपनीचे प्रतिनिधी उपस्थित होते.

चिपी - मुंबई विमानसेवा सुरू होणे ही सिंधुदुर्गसाठी महत्त्वाची बाब असल्याचे सांगून मंत्री राणे म्हणाले की, या विमानतळासाठीच्या पायाभूत सुविधाही लवकरात लवकर पूर्ण कराव्यात. सिंधुदुर्ग हा पर्यटन जिल्हा असल्याने चिपी विमानतळास वेगळे महत्व आहे. चिपी - मुंबई विमानसेवा सुरू करण्यासाठी लागणाऱ्या सर्व परवानग्या एक महिन्यात घेण्यात याव्यात. विमानतळ प्राधिकरण आणि विमानतळ ऑपरेटर यांनी समन्वयाने काम करावे. भविष्यात या विमानतळाला महत्त्व येणार असल्याने प्राधान्याने कामे करावीत. सुशोभीकरणाचे काम तातडीने हाती घ्यावे, अशा सूचनाही मंत्री राणे यांनी दिल्या असल्याची माहिती मिळत आहे.