सदर भूखंड वर्षानुवर्षे दुर्लक्षीत असल्याने नागरिकांत नाराजी…

तळेरे | ब्यूरो न्यूज : सिंधुदुर्ग जिल्ह्यातील तळेरे येथे काही वर्षांपूर्वी तळेरे-कोल्हापूर राज्य मार्गालगत असलेला एक भूखंड शासनाने टपाल कार्यालयाच्या उभारणीसाठी संपादन केलेला आहे.

सूत्रांच्या हवाल्याने आलेल्या माहितीनुसार ,सदर भूखंडास सभोवताली दगडी कंपाऊंड भिंत देखील बांधण्यात आलेली आहे. परंतु प्रदीर्घ कालावधी उलटून देखील सदर भूखंडावर टपाल कार्यालयाच्या उभारणीबाबत कोणतीच ठोस हालचाल व कार्यवाही शासनाकडून करण्यात आलेली नाही. त्यामुळे सदर भूखंडावर सद्यस्थितीत झाडे-झुडपे यांचे साम्राज्य पसरले असून सभोवताली भंगार चीजवस्तू यांचे गोडाऊन निर्माण झाले आहे.

तळेरे सारख्या शहर वजा विकसनशील गावात जमिनीचे भाव वधारलेले आहेत. त्यामुळे शासनाने टपाल कार्यालयाच्या इमारत उभारणीसाठी संपादन केलेला सदर भूखंड वर्षानुवर्षे दुर्लक्षित ठेवणे हे योग्य नसून संबंधित जमीन मालकांवर अन्यायकारक आहे. तरी शासनाने एकतर सदर भूखंडावर सुसज्ज असे टपाल कार्यालय उभारण्याची कार्यवाही तात्काळ सुरू करावी अशी मागणी स्थानिकांतून होत आहे.

अथवा स्थानिक जीर्ण झालेल्या तलाठी व मंडळ अधिकारी कार्यालय, जीर्ण रेशन दुकान व गोदाम याचप्रमाणे कृषी कार्यालय, महावितरण कार्यालय, पोलीस ठाणे, ट्रामा केअर सेंटर, प्राथमिक आरोग्य केंद्र, महावितरण कार्यालय इ. यांपैकी कोणत्याही एक किंवा अनेक इमारतींच्या उभारणीसाठी सदर भूखंड संबंधीतांकडे हस्तांतरीत व आरक्षित करून सदर इमारतींच्या उभारणी बाबतची कार्यवाही तात्काळ सुरू करावी. अन्यथा शासनाने सदर भूखंड संपादित करताना नमूद केलेल्या प्रयोजनाच्या पूर्ततेबाबत आजतागायत कार्यवाही पूर्ण न केल्याने, सदर भूखंड संबंधित जमीन मालकांच्या ताब्यात मालकी हक्काने विनामोबदला तात्काळ हस्तांतरीत करावा अशी मागणी तळेरे येथील सामाजिक कार्यकर्ते राजेश जाधव यांनी केली आहे.