तातडीने खड्डा बुजवण्याची नागरिकांची मागणी….!

चौके | अमोल गोसावी :
मालवण चौके कुडाळ मुख्य रस्त्यावर श्री राम मंदिर नजीक आणि आजगावकर आजी इको स्टोअर च्या समोर रस्त्याच्या मधोमध भला मोठा खड्डा पडून याठिकाणच्या रस्त्याची दुर्दशा झालेली आहे.

सदर खड्डा पडून दोन महिने उलटले तरी संबंधित बांधकाम विभागाने अजून तो खड्डा तसेच त्याच्या आजूबाजूला असलेले खड्डे बुजवण्यासंबधीत कोणतीच कार्यवाही केलेली नाही. सुमारे एक फूट खोलीचा हा खड्डा मात्र या मार्गावरील वाहनचालकांसाठी डोकेदुखी ठरत आहे. गेल्या काही दिवसात या धोकादायक खड्ड्यामुळे अनेक दुचाकीस्वारांचा अपघात झालेला आहे. त्यात काही जण किरकोळ जखमीही झाले आहेत.

बांधकाम विभागाच्या उदासिनतेमुळे दोन महिने उलटले तरी या रस्त्याची दुरुस्ती झालेली नाही. उलट दिवसेंदिवस त्या खड्ड्याची खोली आणि लांबी रुंदी वाढतच आहे. याबद्दल वाहनचालक आणि स्थानिक रहिवासी यांच्याकडून तीव्र नाराजी व्यक्त केली जात आहे. आणि काळसे रवळनाथ मंदिर ते राममंदिर या परिसरातील मुख्य रस्त्यावर पडलेले खड्डे संबंधित बांधकाम विभागाने तातडीने बुजवावेत अशी मागणी सामाजिक कार्यकर्ते श्री. रमेश मयेकर, आणि श्री. राहुल कुळकर्णी यांनी केली आहे. अन्यथा तीव्र आंदोलन छेडले जाईल असा इशाराही श्री. मयेकर यांनी दिला आहे.