तारकर्ली । सुरेश बापर्डेकर :

तारकर्ली गावातील विद्युत पुरवठा सातत्याने खंडित होत असून विद्युत तारांना लागत असलेल्या झाडांच्या फांद्या अतिप्रमाणात वाढलेल्या आहेत. आठ दिवसांच्या कालावधीत त्या हटवून विद्यूत पुरवठा सुरळीत करावा, अन्यथा नागरिकांच्या उद्रेकाला सामोरे जावे लागेल. असे निवेदन तारकर्ली येथील त्रस्त विद्युत ग्राहक व नागरिक यांनी प्रसिद्धी दिलेल्या पत्रकाद्वारे दिला आहे.

या प्रसिद्धी पत्रकात नमूद केल्याप्रमाणे, मां. उपकार्यकारी अभियंता, उपविभागीय कार्यालय महावितरण मालवण यांना निवेदनाची प्रत देऊन तारकर्ली गावातील सातत्याने विद्युत पुरवठा खंडीत होत असल्या संबंधी सूचना करण्यात आल्या आहेत.

या सूचनांची, मागण्यांची तिव्रता लक्षात घेऊन शक्य तितक्या लवकर कार्यवाही करून नागरिकांना होणारा नाहक त्रास थांबवावा असे सांगण्यात आले आहे.

तारकर्ली गाव हे पर्यटनदृष्ट्या अत्यंत महत्वाचे असल्याने या गावात नेहमीच पर्यटकांची वर्दळ वाढलेली दिसून येते.

तारकर्ली गावात गेले कित्येक महिने विजेचा खेळ खंडोबा होत असल्याने ग्रामस्थ हैराण झाले असून तारकर्ली रहिवास्यांमध्ये प्रचंड मोठ्या प्रमाणात नाराजीचा सूर असल्याचे दिसून येत आहे.

जर हा खेळ खंडोबा वेळीच थांबला नाही तर मोठा उद्रेक होईल व याला सर्वस्वी महावितरण अधिकारी जबाबदार असतील असे ग्रामस्थांच्यावतीने कळविण्यात आले आहे.

सततच्या वेळीअवेळी विद्युत पुरवठा खंडीत होण्यामूळे कित्येकांची विद्युत उपकरणे नादुरुस्त झालेली आहेत, सद्या होत आहेत. हा भुर्दंड ग्राहकांचा विनाकारण सोसावा लागत आहे. उष्णतेने नागरिक आणि पर्यटक हैराण होत असून पुढे पावसाळ्याची सुरूवात झाल्यास अधिक भिषण समस्या उभ्या राहतील असे ग्रामस्थांचे मत आहे.

त्यातच विद्युतवाहिन्यांना स्पर्श करणा-या झाडाच्या फांद्या, झावळे हा देखील कळीचा मुद्दा बनला आहे.

तरी पाहणी करून येत्या आठ दिवसात दुरुस्तीची कामे सुरू करण्यासंबंधीच्या सूचना संबंधितांना देण्यात याव्यात व त्वरीत सर्व समस्यांमधून तारकर्लीवासियांची मुक्तता करावी असे मालवण महावितरण अधिकारी यांना दिलेल्या निवेदनात म्हटले आहे.