सिंधुदुर्ग महाविद्यालयात जागतिक लोकसंख्या दिनानिमित्त जागृतीपर उपक्रम संपन्न.

मालवण : मालवण शहरातील स. का. पाटील सिंधुदुर्ग महाविद्यालय, मालवण येथे अर्थशास्त्र विभाग व व्यावसायिक अर्थशास्त्र विभाग यांच्या संयुक्त विद्यमाने जागतिक लोकसंख्या दिन विविध जनजागृतीपर उपक्रमांनी साजरा करण्यात आला. वाढती लोकसंख्या, तिचे सामाजिक - आर्थिक परिणाम, कुटुंब नियोजन, आरोग्य जागरूकता आणि शाश्वत विकास या विषयांबाबत विद्यार्थ्यांमध्ये जागरूकता निर्माण करण्याच्या उद्देशाने या कार्यक्रमाचे आयोजन करण्यात आले. यावेळी कार्यक्रमाच्या अध्यक्षस्थानी अर्थशास्त्र विभाग प्रमुख डॉ. डी. व्ही. हरगिले होते. 

व्यावसायिक अर्थशास्त्र विभाग प्रमुख लेफ्ट. प्रा. डॉ. एम. आर. खोत यांनी प्रास्ताविक करताना जागतिक लोकसंख्या दिनाचे महत्त्व स्पष्ट केले. लोकसंख्या वाढीमुळे देशाच्या आर्थिक, सामाजिक, शैक्षणिक व पर्यावरणीय क्षेत्रांवर होणाऱ्या परिणामांचा आढावा घेत त्यांनी विद्यार्थ्यांना जबाबदार नागरिक म्हणून लोकसंख्या नियंत्रण व जनजागृतीमध्ये सक्रिय सहभाग नोंदविण्याचे आवाहन केले.

यावेळी प्रमुख वक्त्या डॉ. उज्वला सामंत यांनी 'लोकसंख्या वाढ आणि परिणाम तसेच लोकसंख्या नियंत्रणाची आवश्यकता' या विषयावर मार्गदर्शन केले. भारतातील लोकसंख्येची सद्यस्थिती, लोकसंख्या वाढीमुळे निर्माण होणाऱ्या बेरोजगारी, दारिद्रय, शिक्षण, आरोग्य, निवास, अन्नसुरक्षा आणि पर्यावरणीय समस्यांवर त्यांनी विवेचन केले. तसेच कुटुंब नियोजन, महिलांचे शिक्षण, स्त्री-पुरुष समानता, आरोग्य सेवा, जनजागृती आणि सुशिक्षित समाजाची निर्मिती या माध्यमातून लोकसंख्या स्थिरतेचे उद्दिष्ट साध्य करता येईल, असे त्यांनी प्रतिपादन केले. 

यावेळी संग्राम पवार, संकेत बेळेकर, शिक्षक, शिक्षकेतर कर्मचारी तसेच विद्यार्थी उपस्थित होते. कार्यक्रमाचे सूत्रसंचालन मिसबा काझी हिने केले तर गौतम मानवर याने आभार मानले. कार्यक्रमाच्या यशस्वी आयोजनासाठी आरती सामंत, तन्वी साळकर, कु. मयुरेश, कु. मितेश आणि कु. विनीत यांनी परिश्रम घेतले.