श्री देव रामेश्वर कांदळगांव यांचा २ डिसेंबर रोजी वार्षिक जत्रोत्सव.

श्री देव रामेश्वर देवस्थान व परिसर देवालये विश्वस्त मंडळ कांदळगांव, राणे परब मानकरी आणि कांदळगांव ग्रामस्थ यांचे उपस्थितीचे आवाहन. 

मालवण | ब्यूरो न्यूज : सिंधुदुर्ग जिल्ह्यातील मालवण तालुक्यातल्या श्री देव रामेश्वर, कांदळगांव यांचा, ऐतिहासिक पार्श्वभूमी असलेला तसेच कोकणातील सन्मानाचा असा वार्षिक जत्रोत्सव २ डिसेंबर २०२५ रोजी संपन्न होत आहे. श्री देव रामेश्वर देवस्थान व परिसर देवालये विश्वस्त मंडळ कांदळगांव, राणे परब मानकरी आणि कांदळगांव ग्रामस्थ यांच्यावतीने ही माहिती देण्यात आली आहे.  

२ डिसेंबर रोजी सकाळी शिवपिंडीचे स्नान - अभिषेक आणि त्यानंतर विविध धार्मिक विधी व कार्यक्रम संपन्न होणार आहेत.

रात्री १० नंतर पालखी लवाजम्यासह, पारंपरिक वाद्यांच्या गजरात व भक्तीपूर्ण उत्साहात श्री देव रामेश्वर यांचे वारेसूत्र तसेच श्री देव रामेश्वर मंदिर परिसरातील सर्व देवस्थानांची भेट असे कार्यक्रम संपन्न होणार आहेत. त्यानंतर श्री देव रामेश्वर गादीवरती स्थानापन्नता व भक्तांना आशिर्वादाचा कार्यक्रम संपन्न होईल.

त्यानंतर रात्री सुप्रसिद्ध गोरे दशावतार नाट्य मंडळ यांचे दशावतार नाट्य सादरीकरण होणार आहे. पहाटे दशावतार नाट्यानंतर मंदिराच्या तळीमध्ये, दशावतारातील श्रीकृष्ण पात्राच्या हस्ते दह्याचे गाडगे फोडून उत्सवाची सांगता होईल अशी माहिती मिळत आहे.

यंदा, प्रतिवर्षाप्रमाणे श्री देव रामेश्वर कांदळगांव जत्रोत्सवाला असंख्य भाविक भक्तांची उपस्थिती असून त्या अनुषंगाने सर्व तयारी करण्यात येत असल्याची माहिती श्री देव रामेश्वर देवस्थान व परिसर देवालये विश्वस्त मंडळ कांदळगांव, राणे परब मानकरी आणि कांदळगांव ग्रामस्थ यांच्यावतीने देण्यात आली आहे.