श्री कालिका देवी मंदिर, हडी येथे त्रिपुरारी पौर्णिमा जत्रोत्सव भक्तीपूर्ण उत्साहात.

मालवण | ब्यूरो न्यूज : श्री कालिका देवी मंदिर, हडी ( ता. मालवण) येथे ४ नोव्हेंबर २०२५ रोजी त्रिपुरारी पौर्णिमा जत्रोत्सव भक्तीपूर्ण उत्साहात संपन्न झाला. यावेळी मंदिर परिसरात दिव्यांची आरास व रांगोळी कला अविष्कारा प्रभू श्रीराम प्रतिमा साकारली गेली.

त्रिपुरारी पौर्णिमा जत्रोत्सवानिमित्त कालिका देवी मंदिरात विविध कार्यक्रम संपन्न झाले. सकाळी देवीच्या मंगल स्नानाने कार्यक्रमाची सुरुवात होऊन देवीला सुवासिक फुलांची मनमोहक आरास करण्यात आली. त्यानंतर महाआरती होऊन ओटी भरण्यास प्रारंभ झाला. त्यानंतर गावराठीचे देव नागेश्वर मंदिर येथून कालिका मंदिर येथे आगमन झाले. सायंकाळी दीपोत्सव साजरा होऊन मंदिर परिसरात दिव्यांची आरास करण्यात आली. मंदिरात आकर्षक विद्युत रोषणाई करण्यात आली. रात्री गडगेवाडी सेवा मंडळ, हडी यांचे भजन, पोथी वाचन व बारापाच मानकऱ्यांच्या हस्ते गणेश पूजन व रात्री १२ वाजता गावराठी व पालखी प्रदक्षिणा सोहळा संपन्न झाला. यानिमित्त रात्री भाविकांसाठी महाप्रसादाचे आयोजनही करण्यात आले होते. या जत्रोत्सवास भाविकांची मोठ्या संख्येने उपस्थिती होती. 

सौजन्य | मालवण ब्यूरो