ग्रामदैवत श्री देव नारायण आणि श्री देव रामेश्वर यांचा बलिप्रतिपदे दिवशी ( २२ ऑक्टोबर रोजी) ऐतिहासिक वार्षिक पालखी सोहळा . 

मालवण | ब्यूरो न्यूज : मालवणचे ग्रामदैवत श्री देव नारायण आणि श्री देव रामेश्वर यांचा ऐतिहासिक पालखी सोहळा बलिप्रतिपदा म्हणजे दीपावली पाडव्या निमित्त २२ ऑक्टोबर रोजी दुपारी १ वाजता सुरू होणार आहे. भाविकांनी यात मोठ्या उत्साहाने सहभागी व्हावे, असे आवाहन श्री देव रामेश्वर, श्री देव नारायण, श्री देवी सातेरी, देवस्थान ट्रस्टच्यावतीने करण्यात आले आहे.

मालवणचे ग्रामदैवत श्री देव रामेश्वर व श्री देव नारायण यांचा वार्षिक पालखी सोहळा २२ ऑक्टोबर रोजी दुपारी १ वाजता श्री देव रामेश्वर मंदिर येथून निघून श्री देव नारायण, श्री देवी पावणाई, श्री देवी भावई, श्री देवी सातेरी या सर्व देवतांना सांगणे करून आडवणमार्गे तानाजी नाका, श्री देव भूतनाथ मंदिर येथे थांबून समुद्रमार्गे मोरेश्वर (मोरयाचा धोंडा) येथे थांबेल. त्यानंतर दांडेश्वर मंदिर येथून श्री देवी काळबादेवी मंदिर येथे थांबून जोशी मांड येथे येईल व त्यानंतर नगर वाचनालयाकडून सोमवार पेठ येथील श्री देव रामेश्वर मांड येथे भाविकांच्या दर्शनासाठी प्रतिवर्षाप्रमाणे थांबून बाजारपेठ भरडमार्गे देऊळवाडा येथे मंदिरात येईल. तरी या पालखी सोहळ्याचा सर्व भाविकांनी लाभ घ्यावा, असे आवाहन देवस्थान ट्रस्टतर्फे केले आहे अशी माहिती मिळत आहे.

पालखी सोहळ्यामुळे मालवण नगरीला जत्रेचे स्वरूप प्राप्त होत असते. दिवाळीच्या तिसऱ्या दिवशी ग्रामदेवत रामेश्वर व नारायणाची पालखी प्रदक्षिणा तसेच रामेश्वर, नारायण आणि त्यांची बहीण काळबादेवीचा पारंपरिक भाऊबीज सोहळा साजरा होत असतो. ग्रामदेवतांची पालखी सजविण्यात येत असते. भूतनाथ येथे पालखीसोबत आलेल्या मानकरी प्रजाजनांना बोडवे - गावकर यांच्याकडून श्रीफळ भेट देऊन स्वागत करण्यात येते. दुपारी १ वाजता रामेश्वर व नारायणाचे वर्सलदार कुटुंबीय आणि गावकर मानकरी रामेश्वरा समोर श्रीफळ ठेवून गाऱ्हाणे घालतात. ढोल - ताशांच्या गजरात रामेश्वर व नारायणाची पालखी मालवणच्या परिक्रमेसाठी बाहेर पडते. प्रारंभी श्री. देव रामेश्वर मंदिराभोवती प्रदक्षिणा संपन्न केली जाते. पुण्यक्षेत्र श्री. मोरयाचा धोंडा, श्री देव दांडेश्वर, बंदर जेटीपर्यंत समुद्रकिनारी भाविकांचा प्रचंड उत्साह असतो. समुद्र किनाऱ्यावर बांबूची मंदिरे, देखावे साकारण्यात येतात. मच्छीमारांकडून श्री देव रामेश्वराचे उत्साहात स्वागत करण्यात येत असते. मोरयाचा धोंडा ते बाजारपेठ दरम्यान भाविकांची गर्दी असते. किनारपट्टी ठिकठिकाणी पताका लावून सजविण्यात येते.

यावर्षी पालखी सोहळ्याला मालवणात भाविकांची गर्दी लक्षात घेऊन देवस्थान ट्रस्टतर्फे सोहळा सुरळीत संपन्न होण्यासाठी सर्व व्यवस्था करण्यात येत आहे तर व्यापारी संघ आणि समस्त मालवण वासिय ह्यांना पारंपरिक वार्षिक सोहळ्याची सात्विक उत्कंठा लागली आहे.