महाराष्ट्र प्रदेश काँग्रेस सरचिटणीसपदी साईनाथ चव्हाण. 

मालवण | ब्यूरो न्यूज : राष्ट्रीय काँग्रेस पक्षाचे माजी सिंधुदुर्ग जिल्हाध्यक्ष आणि प्रांतिक सदस्य साईनाथ चव्हाण यांची महाराष्ट्र प्रदेश काँग्रेस सरचिटणीसपदी निवड करण्यात आली आहे. सिंधुदुर्ग जिल्ह्यातील राष्ट्रीय काँग्रेस पक्षाच्या संघटनात्मक वाढीत साईनाथ चव्हाण यांचा वाटा असल्याने काँग्रेस पक्ष श्रेष्ठींनी श्री. चव्हाण यांची प्रदेश सरचिटणीस पदी नियुक्ती केली आहे.

मालवण वायरी येथील साईनाथ चव्हाण हे गेली चाळीस वर्षे राष्ट्रीय युवक काँग्रेस पक्षाचे काम करत आहेत. त्यांनी यापूर्वी जिल्हा काँग्रेसचे उपाध्यक्ष पद, मालवण तालुका काँग्रेस अध्यक्षपद, सिंधुदुर्ग काँग्रेस पक्षाचे जिल्हा उपाध्यक्ष पद व नंतर सिंधुदुर्ग काँग्रेस जिल्हाध्यक्ष पद अशा जबाबदाऱ्यांवर त्यांनी कामं केले आहे. राष्ट्रीय काँग्रेस प्रांतिक सदस्यपदी गेली कित्येक वर्षे काम केल्यानंतर आता त्यांना काँग्रेस प्रदेश सरचिटणीस म्हणून नियुक्ती देण्यात आली आहे. सिंधुदुर्ग जिल्हाध्यक्ष पद भूषविताना श्री. चव्हाण यांनी जिल्ह्यातील अनेक सत्तास्थाने काँग्रेस पक्षांकडे ठेवण्यात महत्वाचे काम केले होते.

श्री. चव्हाण यांची काँग्रेस प्रदेश सरचिटणीस म्हणून निवड झाल्याने निश्चितपणे काँग्रेस पक्ष वाढीच्या दृष्टीने त्यांचे प्रयत्न राहतील, अशी अपेक्षा कार्यकर्त्यांतून व्यक्त होत असून त्यांच्या या निवडीबद्दल सर्व स्तरातून अभिनंदन होत आहे.