वाभवे-वैभववाडी नगराध्यक्षा नेहा माईणकर व सहकार्यांनी बेकायदेशीर अतिक्रमण संदर्भात दिले लेखी निवेदन.

नवलराज काळे | सहसंपादक : सिंधुदुर्ग जिल्ह्यातील
वैभववाडी शहरात स्टाॅल अतिक्रमण संदर्भात नगरपंचायत मार्फत बेकायदेशीर तथा विना परवानगी अतिक्रमणधारकांना आता चाप बसायची शक्यता आहे. वाभवे – वैभववाडी नगराध्यक्षा नेहा माईणकर यांनी गाळे, खोके व हातगाडी लावण्यास परवानगी दिली आहे का व परवानगी दिली नसल्यास तत्काळ अतिक्रमण हटवा अशा मागणीचे लेखी निवेदन वैभववाडी तहसीलदार दिप्ती देसाई यांना दिले आहे.

अतिक्रमण करणाऱ्या स्टॉल धारकांना अतिक्रमण हटविण्यासंदर्भात रीतसर नोटीस दिली जाईल. त्यांनी अतिक्रमण न हटविल्यास स्टॉल हटाव मोहीम हाती घेतली जाईल असे तहसीलदार देसाई यांनी या निवेदना बद्दल प्रतिक्रिया देताना सांगितले. वाभवे – वैभववाडी नगरपंचायत हद्दीतील शासकीय जागेत सद्यस्थितीत विनापरवाना गाळे, खोके व हातगाड्या दिसून येत आहेत. नगरपंचायतने सर्वसाधारण सभेत अतिक्रमण हटाव बाबत ठराव संमत केला आहे. त्यानुसार नगरपंचायतने अतिक्रमण हटविले होते. मात्र पुन्हा एकदा नगरपंचायत हद्दीत राज्यमार्गाच्यालगत मोठ्या प्रमाणात गाले, हातगाड्या व खोके परवानगी शिवाय दिसून येत आहेत. नगरपंचायत मार्फत शहरात विविध विकास कामे प्रस्तावित आहेत. ती कामे करताना हे सध्या असलेले बेकायदा अतिक्रमण हे अडथळा ठरणार आहे. अतिक्रमण आपल्या विभागाच्या अखत्यारीमधील जमिनीत होत आहे. या अतिक्रमणधारकांना स्टॉल, गाले व हातगाड्या लावण्यास आपणाकडून परवानगी देण्यात आली आहे का व देण्यात आली असली तर परवानगीची प्रत नगरपंचायतीला उपलब्ध करून देण्यात यावी आणि परवानगी दिली नसल्यास आपल्या स्तरावर सदर अतिक्रमणावर तात्काळ कारवाई करावी असेही निवेदनात नमूद आहे.

निवेदन देताना नगराध्यक्षा नेहा माईणकर, उपनगराध्यक्ष संजय सावंत, बांधकाम सभापती विवेक रावराणे, नगरसेवक डॉ. राजेंद्र पाताडे, माजी जि. प. सदस्य सुधीर नकाशे, नगरसेवक सुभाष रावराणे, नगरसेविका यामिनी वळवी, सुंदरा निकम, रेवा बावदाने व राजन तांबे आदी उपस्थित होते.