भरतगड हायस्कुल परिसरात लोकवर्गणीतून झेंडू लागवड..!
मसुरे | प्राजक्ता पेडणेकर :
मसुरे देऊळवाडा येथील ग्रामस्थांकडून मसुरे भरतगड हायस्कूल नं.२ च्या विद्यार्थी, शिक्षक, शाळा समिती अध्यक्ष व ग्रामस्थ यांच्या श्रमदानाने लोकवर्गणीतून शाळा परिसरात पाच गुंठे जमीनीत पाचशे पेक्षा जास्त झेंडूच्या रोपांची लागवड करून एक स्तुत्य उपक्रम राबविला आहे.
या लागवडीतून भविष्यात या रोपांपासून मिळणाऱ्या फुलांची विक्री करून त्यातून मिळालेले पैसे संस्थेला देणगी स्वरूपात देण्याचे निश्चित करण्यात आले आहे. सदर संकल्पना शाळा समिती अध्यक्ष विठ्ठल लाकम व संस्थेचे पदाधिकारी, शिक्षक यांच्या संकल्पनेतून पुढे आली आणि ती प्रत्यक्षात पूर्ण करण्यात आली आहे.
जमिनीच्या मशागतीपासून वाफे तयार करून पूर्ण लागवड होईपर्यंत विद्यार्थ्यांनी मेहनत घेतली आहे. त्यासाठी शिक्षकांचे मार्गदर्शन त्यांना लाभले. यावेळी शाळा समिती अध्यक्ष विठ्ठल लाकम, सदस्य सोनोपंत बागवे, विद्या लाकम, प्रभारी मुख्याध्यापक एस. आर. कांबळे, एस. एस. हळवे, सौ. एस. एस. मसुरेकर, सौ. ए. व्ही. कोदे, गणेश सावंत, विद्यार्थी विद्यार्थिनी आणि ग्रामस्थ यांनी श्रम घेतले.
(आपल्या वेबपोर्टल वरील बातम्या, माहिती, लेखन, छायाचित्रे, जाहीराती व संबंधित मजकूर आणि इतर घटकांच्या विश्वासार्हतेची जबाबदारी आपली सिंधुनगरी न्यूज चॅनेल, प्रतिनिधी, संपादन विभाग तसेच आपली सिंधुनगरी न्यूज चॅनेलची नाही, याची कृपया नोंद घ्यावी.)
