वैभववाडी | नवलराज काळे :
वैभववाडी तालुक्यातील मानव विकासच्या सर्व एसटी गाड्या पूर्ववत करा व विद्यार्थ्यांची होणारी गैरसोय दूर करा. या मागणीचे निवेदन वैभववाडी भाजपा अध्यक्ष नासीर काझी यांनी तहसीलदार रामदास झळके यांना दिले आहे. गाड्या पूर्ववत न झाल्यास 1 जुलै रोजी तालुक्यात ठिकठिकाणी आंदोलन छेडण्याचा इशाराही काझी यांनी निवेदनाद्वारे दिला आहे. दरम्यान कायदा व सुव्यवस्था बिघडल्यास संपूर्ण जबाबदारी एसटी विभाग अधिकारी यांची राहील असेही त्यांनी निवेदनात नमूद केले आहे.
वैभववाडी तालुक्यातील शाळा, विद्यालये सुरू होऊन पंधरा दिवस झाले आहेत. परंतु मार्गावरील एसटीच्या फेऱ्या बंद करण्यात आल्या आहेत. त्यामुळे विद्यार्थ्यांचे अतोनात शैक्षणिक नुकसान होत आहे. तर काही विद्यार्थ्यांना खाजगी वाहनाने दाम दुप्पट आर्थिक भुर्दंड सोसत प्रवास करावा लागत आहे. संबंधित यंत्रणेकडे वारंवार विचारणा करण्यात आली असून याबाबत कोणतीच कार्यवाही केलेली नाही. त्यामुळे यापुर्वी सुरू असलेल्या मानव विकास व शालेय विद्यार्थ्यांच्या सोयीच्या इतर गाड्या त्वरित सुरू कराव्यात असा इशारा निवेदनातून नासीर काझी यांनी दिला आहे.