वैभववाडी | नवलराज काळे : सिंधुदुर्ग जिल्ह्यातील वैभववाडी तालुक्यातल्या खांबाळे साळुंखेवाडी येथील संजय साळुंखे यांची चोरीला गेलेली दुचाकी सापडली. आचिर्णे रासाई मंदिरानजीक रस्त्याच्या कडेला गटारात पालापाचोळ्यात ही दुचाकी दडवून ठेवली होती. शुक्रवारी रात्री ही गाडी चोरीला गेली होती.

तालुक्यात शुक्रवारी रात्री चोरट्यांनी सात दुकाने व दोन घरे फोडली होती. तसेच दोन दुचाकी देखील चोरल्या होत्या. त्यापैकी खांबाळे येथील संजय साळुंखे यांची घराच्या अंगणात असलेली दुचाकी चोरट्यांनी लंपास केली होती. ३५ वर्षापूर्वीची आर एक्स १०० ही दुचाकी चोरट्यांनी चोरून नेली होती. शनिवारी याबाबत संजय साळुंखे यांनी पोलीसांत तक्रार दिली. त्यानंतर त्या गाडीची सर्वत्र शोधाशोध सुरू होती. अखेर आज सकाळी ही गाडी आचिर्णे येथील रासाई मंदिरानजीक रस्त्याकडेला गटारात सापडली. या गाडीवर पालापाचोळा टाकून झाकून ठेवली होती. त्यामुळे साळुंखे कुटुंबांनी सुटकेचा निश्वास सोडला आहे. तालुक्यातून शुक्रवारी चोरीला गेलेल्या दोन दुचाकीपैकी एक दुचाकी सापडली. मात्र दुसरी शोधणे पोलिसांसमोर आव्हान आहे. तसेच चोरट्यांनी खांबाळे येथून चोरलेली दुचाकी नेमकी याठिकाणी का ठेवली होती याचा शोध घेणे देखील गरजेचे आहे. यातून काही धागेदोरे पोलीसांच्या हाती लागण्याची शक्यता आहे. अधिक तपास वैभववाडी पोलीस करीत आहेत.

(फोटो : प्रातिनिधिक गुगल संग्रहीत)