सावंतवाडी तहसीलदार राजाराम म्हात्रे यांना दिले पूरग्रस्तांनी निवेदन

बांदा | राकेश परब : सावंतवाडी तालुक्यातील विलवडे गावात जुलै महिन्यात आलेल्या महापुरात नुकसान झालेल्या शेतकरी तसेच ग्रामस्थांना अद्यापही शासकीय मदत मिळाली नाही. नुकसान ग्रस्त लोकांच्या खात्यात निधी जमा व्हावा. तसेच अधिकाऱ्यांच्या मनमानी कारभाराची चौकशी व्हावी, अशी मागणी विलवडे ग्रामस्थानी केली आहे. याबाबतचे निवेदन राष्ट्रवादीचे तालुकाध्यक्ष पुंडलिक दळवी यांच्या नेतृत्वाखाली तहसीलदार राजाराम म्हात्रे यांना देण्यात आले. नुकसानग्रस्ताना २० नोव्हेंबर पुर्वी नुकसान भरपाई न मिळाल्यास तहसिलदार कार्यालयासमोर तीव्र आंदोलन छेडण्यात येईल असा कडक इशारा ग्रामस्थानी यावेळी दिला. आँगस्ट २०१९ आणि जुलै २०२१ मध्ये आलेल्या महापुरात विलवडे गावातील लोकांचे शेती,बागायतीचे लाखो रुपायांचे नुकसान झाले. झालेले नुकसान पाहता शासनाकडून मिळणारी नुकसान भरपाई पुरेशी नाही.मात्र प्रशासकिय कार्यालयातील कर्मचा-यांच्या मनमानी तसेच सदोष कामामुळे शासनाची तुटपुंजी मदत सुद्दा पुरग्रस्तांना मिळवण्यासाठी वारंवार हेलपाटे मारावे लागत असल्याची नाराजी मळावाडी येथील सामाजिक कार्यकर्ते विनायक दळवी यांनी व्यक्त केली. यावेळी सोमवारी याबाबत संबंधितांची बैठक घेऊन नुकसानग्रस्तांना मदत मिळवून देण्याच आश्वासन म्हात्रे यांनी दिलं.यापुर्वी विलवडेत आलेली मदत देताना गावातील लोकांना वारंवार डावलण्यात आल्याचे आरोप ग्रामस्थांनी केला. शासनाने निर्धारीत केलेली रक्कम काही मोजक्याच ग्रामस्थांना मिळाली असून उर्वरित वंचित नुकसानग्रस्ताना २० नोव्हेंबर पुर्वी न मिळाल्यास तहसिलदार कार्यालयासमोर तीव्र आंदोलन छेडण्यात येईल असा कडक इशारा ग्रामस्थानी दिला. यावेळी सखाराम सावंत,अरुण दळवी,सखाराम दळवी तसेच मळावाडी,फाैजदारवाडी, पिसुळे(वरचीवाडी)येथील पुरग्रस्त बहुसंख्येत उपस्थित होते.