मालवण नगरपरिषदकडून नमो उद्यानाचा सर्वानुमते निर्णय व जागा निश्चिती.
मालवण नगरपरिषदकडून नमो उद्यानाचा सर्वानुमते निर्णय व जागा निश्चित.
मालवण नगराध्यक्षा सौ. ममता वराडकर यांच्या अध्यक्षतेखाली विशेष सभा संपन्न.
मालवण | ब्यूरो न्यूज : मालवण शहरात 'नमो उद्यान' विकसित करण्यासाठी आवश्यक जागा निश्चित करण्याबाबत मालवण नगराध्यक्षा सौ. ममता वराडकर यांच्या अध्यक्षतेखाली नगरपरिषदची विशेष सभा संपन्न झाली. सोमवार, ११ मे रोजी मालवण शहरातील गवंडीवाडा येथील नगरपालिकेच्या मालकीच्या जागेवर नमो उद्यान निर्माण करण्यावर सर्वानुमते निर्णय घेण्यात आला.
यावेळी नगराध्यक्षा सौ. ममता वराडकर यांच्यासह उपनगराध्यक्ष दीपक पाटकर, मुख्याधिकारी प्रतीक थोरात, बांधकाम सभापती सहदेव बापार्डेकर, स्वच्छता व आरोग्य सभापती पूनम चव्हाण, महिला बालकल्याण सभापती अन्वेषा आचरेकर, समाज कल्याण सभापती सिद्धार्थ जाधव, स्विकृत नगरसेवक महेश कांदळगावकर, स्विकृत नगरसेवक रविकिरण तोरसकर, नगरसेवक ललित चव्हाण, नगरसेवक सुदेश आचरेकर, नगरसेवक महेंद्र म्हाडगुत, नगरसेवक मंदार ओरसकर, नगरसेवक तपस्वी मयेकर, नगरसेविका महानंदा खानोलकर, नगरसेविका शर्वरी पाटकर, नगरसेविका अश्विनी कांदळकर, नगरसेविका मेघा सावंत, नगरसेविका दर्शना कासवकर, भाग्यश्री मयेकर आदी उपस्थित होते.
यावेळी मालवण शहरात शासन आदेशानुसार नमो उद्यान साकारण्यासाठी जागा निश्चितीचा ठराव मांडण्यात आला. राज्यातील नगरपरिषदांना वैशिष्ट्यपूर्ण कामासाठी विशेष अनुदान देण्यात येते. सदर योजने अंतर्गत प्रत्येक नगरपरिषद व नगरपंचायती उत्कृष्ट उद्यान विकसित करण्याकरिता रु. १ कोटी निधी मंजूर करण्यात आलेला आहे. याकरिता तातडीने जागा निश्चित करून काम सुरु करण्याचे शासनाचे आदेश आहेत. या नमो उद्यानसाठी मालवण शहरातील सात आरक्षित जागा सूचित करण्यात आल्या. मात्र सदर जागांच्या भूसंपादनाला मोठ्या प्रमाणात निधी लागणार असल्याने तसेच सदर प्रक्रियेस विलंब होणार असल्याने नगरपालिकेच्या मालकीची व ताब्यात असलेली गवंडीवाडा येथील जागा निश्चित करून तेथे उद्यानाचे काम तात्काळ सुरु करणे शक्य आहे, असे मुख्याधिकारी प्रतीक थोरात यांनी सांगितले.
यावर सभागृहात चर्चा झाली. नगरसेविका शर्वरी पाटकर यांनी ठरावाला सूचक म्हणून भुमिका मांडली. तर प्रभागातील नगरसेवक मंदार ओरसकर यांनी गवंडीवाडा येथे नमो उद्यान होत असेल तर आनंद आहे. मात्र सदर जागेच्या आजूबाजूला व्हाळी असून कचराही टाकला जातो. त्यामुळे दुर्गंधी पसरत असल्याने व्हाळीतील सांडपाणी बंद करावे तसेच कचरा टाकण्यास बंदी करावी, असे सांगत ठरावाला अनुमोदन दिले. सदर जागेबाबत अन्य नगरसेवक यांनीही सकारात्मक चर्चा करून नमो उद्यानासाठी गवंडीवाडा येथील जागेला सर्वानुमते मंजुरी देण्यात आली.
(आपल्या वेबपोर्टल वरील बातम्या, माहिती, लेखन, छायाचित्रे, जाहीराती व संबंधित मजकूर आणि इतर घटकांच्या विश्वासार्हतेची जबाबदारी आपली सिंधुनगरी न्यूज चॅनेल, प्रतिनिधी, संपादन विभाग तसेच आपली सिंधुनगरी न्यूज चॅनेलची नाही, याची कृपया नोंद घ्यावी.)
