अपक्ष उमेदवार सौ. उमा अनिरुद्ध आठवले यांचा प्रचाराचा शुभारंभ. 

श्री गणेशाचे दर्शन घेऊन मतदारांशी साधलेल्या संवादाला उत्स्फूर्त प्रतिसाद.

प्रभाग '६ ब' मध्ये महिलांकडून तसेच युवकांकडून मिळत असलेल्या प्रतिसादामुळे प्रचाराला गती.

अलिबाग | ब्यूरो न्यूज : नगरपालिका निवडणूक प्रभाग क्रमांक '६ ब' मध्ये अपक्ष उमेदवार म्हणून रिंगणात उतरलेल्या सौ. उमा अनिरुद्ध आठवले यांनी श्री गणेशाचे दर्शन घेत प्रचाराला प्रारंभ केला. पहिल्याच दिवशी मतदारांशी संवाद साधताना त्यांना मिळालेला उत्स्फूर्त प्रतिसाद लक्षवेधी ठरला.

सौ. आठवले यांनी प्रभागातील नागरिकांच्या समस्या प्रत्यक्ष जाणून घेण्यासाठी घराघरात भेटी सुरू केल्या आहेत. पाणीपुरवठा, स्वच्छता, रस्त्यांची दुरुस्ती, पथदिवे, महिला सक्षमीकरण आणि युवकांसाठी रोजगाराभिमुख उपक्रम या मुद्द्यांवर काम करण्याचे आश्वासन त्यांनी मतदारांना दिले. अपक्ष म्हणून कोणत्याही राजकीय दबावापासून दूर राहून केवळ प्रभागाच्या विकासासाठी काम करण्याचा आपला संकल्प असल्याचे त्यांनी स्पष्ट केले.

प्रभागातील महिलांकडून तसेच युवकांकडून त्यांना मिळत असलेल्या सकारात्मक प्रतिसादामुळे प्रचाराला चांगली गती मिळत आहे. स्थानिक पातळीवर त्यांच्या साधेपणामुळे आणि नागरिकांशी जुळवून घेण्याच्या स्वभावामुळे त्यांच्याबद्दल आपुलकी निर्माण होत असल्याचे मतदार व्यक्त करत आहेत.

सौ. उमा आठवले यांच्या अपक्ष उमेदवारीला मिळणारा वाढता पाठिंबा प्रभाग '६ ब' मध्ये चर्चेचा प्रमुख विषय बनला आहे, अशी माहिती मिळत आहे.