जल व्यवस्थापनाच्या युक्तीला साथ आणि जाणीवेच्या प्रचितीचा समर्थ हात..!

श्री. महेश इंगळे यांचे पाणी प्रश्नी दातृत्व.

हसापूर येथे नवीन विहीर खोदाईसाठी २ गुंठे जमीन खरेदीस केली ८ लाख रुपयांची आर्थिक मदत.

अक्कलकोट | प्रतिनिधी : अक्कलकोट तालुक्यातील मौजे हसापूर येथे गेल्या अनेक वर्षापासून गावामध्ये पाणी टंचाई भासत होती. यंदाचा पावसाळा समाधानकारक होवूनही अक्कलकोट शहरासारखेच हसापूर गावातही पाणी प्रश्न कायम आहे. हसापूर मधील ही पाणी टंचाई व पाणी प्रश्न लक्षात घेऊन येथील श्री वटवृक्ष स्वामी महाराज देवस्थानचे चेअरमन तथा माजी नगरसेवक महेश इंगळे यांनी पुढाकार घेऊन यंदाच्या विजयादशमीच्या शुभ मुहुर्तावर नवीन विहीर खोदकामासाठी २ गुंठे जमीन घेऊन देण्यासाठी ८ लाख रुपयांची वैयक्तीकरित्या आर्थिक मदत केली, अशी माहिती मिळत आहे. 

ही आर्थिक मदत प्रथमेश इंगळे यांच्या हस्ते जयवंत जयनंदलाल चव्हाण यांचे मातोश्री रुक्मिणीबाई जयनंदलाल चव्हाण यांना रक्कम तात्काळ सुपूर्द करण्यात आली. महेश इंगळे यांच्या स्तुत्य उपक्रमामुळे हसापूर ग्रामस्थांच्या वतीने महेश इंगळे यांच्याप्रती कौतुकाचा वर्षाव होत आहे. त्यांच्या या मदतीमुळे हसापूर गावचे पाणी प्रश्न कायमचेच मार्गी लागणार आहे. महेश इंगळे यांच्या या मदतीबद्दल ग्रामस्थांनी समाधान व्यक्त केले आहे. त्यांच्या या मदतीबद्दल व विजयादशमी दसऱ्याचे औचित्य साधून मौजे हसापूर ग्रामपंचायत व ग्रामस्थ यांच्या वतीने महेश इंगळे व प्रथमेश इंगळे यांचा सत्कार करण्यात आला. 

यावेळी हसापूर ग्रामपंचायत सरपंच कामाठी, उपसरपंच गौतम घटकाबळे, ग्रामपंचायत सदस्य गणेश कामाठी, मीनाबाई शिंदे, कृष्णाबाई सदाफुले, सायनत्राबाई घटकाबळे, माजी सरपंच पाटील, रामलिंगया स्वामी, शीतापती कामाठी, राजकुमार कामाठी, महेश कामाठी, रोहित जाधव आदींसह हसापूरचे ग्रामस्थ उपस्थित होते. कार्यक्रमाचे सूत्रसंचालन ग्रामपंचायत सदस्य गणेश कामाठी यांनी केले, तर आभार उपसरपंच गौतम घटकांबळे यांनी मानले.