प्रवासी संघटनेचे संतोष राणे यांची माहिती

केंद्रीय मंत्री नारायण राणे यांनी दखल घेत केली रेल्वे मंत्र्यांशी चर्चा

सहसंपादक नवलराज काळे:- नांदगाव पंचक्रोशीतील सर्वांना जवळ असलेले नांदगाव रोड रेल्वे स्टेशन येथे तुतारी रेल्वेला थांबा मिळण्यासाठी छेडण्यात येणारे रेल रोको आंदोलन तूर्तास स्थगिती केल्याची माहिती रेल्वे प्रवासी संघटने चे वाघेरी माजी सरपंच संतोष राणे यांनी दिली. केंद्रीय मंत्री नारायण राणे यांनी याबाबत केंद्रीय रेल्वेमंत्री यांच्याशी पत्रव्यवहार केला असून, फोन द्वारे चर्चा देखील केली आहे. नांदगाव दशक्रोशी मधील ग्रामस्थांच्या मागणीची तातडीने दखल घेत आठ दिवसात याबाबत निर्णय घेण्याचे आश्वासन रेल्वे मंत्र्यांनी केंद्रीय मंत्री नारायण राणे यांना दिले आहे. त्यामुळे हे आंदोलन स्थगित करण्यात आल्याचे श्री. राणे यांनी सांगितले. नांदगांव रेल्वे स्टेशन या ठिकाणी मागील कोरोना काळापासून तुतारी रेल्वे ला थांबा बंद केलेला आहे. वारंवार संबंधित विभागांना व मंत्री यांना विनंती करूनही अद्याप पर्यंत रेल्वे थांब्यासाठी परवानगी मिळालेली नाही. त्यामुळे या ठिकाणी रेल रोको करण्याकरिता नियोजन बैठक नुकतीच घेण्यात आली. या बैठकीत रेल रोको साठी दिवस निश्चित करण्यात आला. व त्यानुसार नियोजन पूर्ण झाले होते अशी माहिती वाघेरी माजी सरपंच संतोष राणे यांनी दिली. दरम्यान या मागणीची केंद्रीय मंत्री नारायण राणे यांनी दखल घेतल्याने तूर्तास हे आंदोलन स्थगित करण्यात आले. मात्र याबाबत येत्या पंधरा दिवसात कार्यवाही न झाल्यास पुन्हा संबंधित प्रशासनाला निवेदन देत आंदोलन छेडले जाईल असा इशारा देखील श्री संतोष राणे यांनी दिला आहे.