मालवण | नझ़िरा शेख़ : सिंधुदुर्ग जिल्ह्यातील मालवणच्या रोझरी इंग्लिश स्कूल या प्रशालेमध्ये इ. १० वी च्या विद्यार्थ्यांचा निरोप समारंभ आज १८ फेब्रुवारी रोजी आयोजित करण्यात आला होता. या कार्यक्रमासाठी अध्यक्ष म्हणून रोझरी पॅरिश चर्चचे प्रमुख फादर सॅबी डिमेलो उपस्थित होते.फादर सॅबी डिमेलो यांनी त्यांच्या अध्यक्षीय भाषणात दहावीच्या विद्यार्थ्यांना त्यांच्या आयुष्यात येणाऱ्या अडथळ्यांना घाबरू न जाता सामोरे जायचे आवाहन केले. आयुष्यात येणाऱ्या समस्यांसाठी सदैव तयार राहण्याचा संदेश देताना फादर सॅबी डिमेलो यांनी आयुष्यात यशस्वी होताना विश्वास ढळू देऊ नका असा जीवन उपदेशही समजावून सांगितला.

शाळेचे मुख्याध्यापक फादर ऑल्विन म्हणाले यांनी विद्यार्थ्यांना शाळेने दिलेल्या शिक्षण आणि संस्कारांची जाणीव राखायचा बोध दिला. त्यामुळे आयुष्यात यशस्वी झाल्यावर या शाळेला विसरून न जाता विद्यार्थ्यांनी त्यांच्या वागण्याने समाजात नाव मिळवावे व शाळेचे नाव उज्ज्वल करावे अशी आशा व्यक्त केली.

रोझरी इंग्लिश स्कूलच्या सर्व शिक्षक व शिक्षकेतर कर्मचारी यांनी १० वीच्या विद्यार्थ्यांना परीक्षेच्या व भविष्यासाठी शुभेच्छा दिल्या.