वायरी बांध येथे श्री दत्त जन्मोत्सव सोहळा.

मालवण | ब्यूरो न्यूज : श्री क्षेत्र दत्त मंदिर, वायरी बांध येथे प्रती वर्षाप्रमाणे श्री दत्त जन्मोत्सव सोहळा साजरा होत आहे. यादरम्यान विविध धार्मिक कार्यक्रम संपन्न होणार आहेत. ३ व ४ डिसेंबर रोजी आयोजित हा सोहळा, श्री सद्गुरू सदानंद माऊली महाराज सांप्रदाय, मालवण यांच्या वतीने साजरा होत आहे. 

सोहळ्यात बुधवारी ३डिसेंबर रोजी, सकाळी १० वाजता घटस्थापना व नामप्रहर आरंभानंतर दिवसभर मंदिर परिसरात नामस्मरण, भजन व विविध कार्यक्रम होत आहेत.

गुरुवार, ४ डिसेंबर रोजीच्या मुख्य कार्यक्रमात सकाळी 7म७ वाजता नामप्रहर समारोह, तर सकाळी ७. ३० वाजता जगद्गुरू श्री दत्तात्रेयांच्या निर्गुण पादुकांवर लघुरुद्राभिषेक होणार आहे. त्यानंतर सकाळी ९ वाजता होम हवन विधी संपन्न होणार आहेत.

दुपारी १२ वाजता 'माधुकरी' हा सांप्रदायिक विधी संपन्न होणार आहे. सायंकाळी ४ वाजता सुप्रसिद्ध किर्तनकार ह. भ. प. श्री. अण्णा देसाई (वालावल) यांचे कीर्तन सादरीकरण होणार असून संध्याकाळी ६ वाजता श्री दत्त जयंती उत्सव साजरा होईल. रात्री ८ वाजता महाप्रसाद होणार आहे.

या सोहळ्यासाठी भाविकांनी कुटुंबासह उपस्थित राहून श्रीदर्शनाचा व महाप्रसादाचा लाभ घ्यावा, असे आवाहन सांप्रदायाचे कार्याध्यक्ष श्री कृष्णा बांदेकर यांनी संप्रदायाच्या वतीने केले आहे.