शहर विकासाच्या संकल्पना विषयावर वेंगुर्ले येथे १९ ऑक्टोबर रोजी चर्चासत्र.

सामाजिक कार्यकर्ते व वेंगुर्ला शहर नागरी कृती समितीचे निमंत्रक ॲड. नंदन वेंगुर्लेकर यांची माहिती.

वेंगुर्ले | ब्यूरो न्यूज : वेंगुर्ले शहर नागरी कृती समिती या अराजकीय संस्थेच्या पुढाकाराने व शहरातील सर्व नागरिकांच्या सहकार्याने शहर विकासाच्या संकल्पना' या विषयावर रविवार १९ रोजी दुपारी ठीक ३ ते ५ यावेळेत नगर वाचनालय, वेंगुर्ले येथे चर्चासत्र आयोजित करण्यात आले आहे अशी माहिती सामाजिक कार्यकर्ते तसेच वेंगुर्ला शहर नागरी कृती समितीचे निमंत्रक ॲड. नंदन वेंगुर्लेकर यांनी दिली आहे.

सकारात्मक दृष्टिकोन डोळ्यांसमोर ठेवून वेंगुर्ले शहर पुढील ५ वर्षात म्हणजे २०३१ पर्यंत कसे असावे यावर शहरातील कोणताही नागरिक आणि जागरूक मतदार स्वतःची परखड मते व्यासपीठावर खुलेपणाने व्यक्त करू शकतो. प्रत्येक सहभागी व्यक्तीला ३ मिनिटाचा वेळ निश्चित करण्यात आला असून रविवारी दुपारी १२ वाजेपर्यंत स्वतःची नावनोंदणी 9422434356, 9423301354, 9921530274 या नंबरवर करावी तसेच उपक्रमात प्रथम २५ नोंदणी केलेल्या नागरिकांना व्यक्त होण्याची संधी मिळणार असून यासाठी कोणतेही शुल्क आकारण्यात आलेले नाही अशी माहिती मिळत आहे.

निवडणुकांच्या पार्श्वभूमीवर, इच्छुक उमेदवारांना स्वतःचे व्हिजन मांडण्याची सुसंधी या उपक्रमामुळे प्राप्त झाली आहे. वेंगुर्ले शहरातील सुजाण, सतर्क, जागरूक, बुद्धिजीवी आणि सुशिक्षित नागरिक तथा मतदारांनी या नाविन्यपूर्ण उपक्रमात सहभाग घेऊन हा कार्यक्रम यशस्वी करावा, असे आवाहन वेंगुर्ले शहर नागरी कृती समितीच्यावतीने करण्यात आले आहे अशी माहिती ॲड. नंदन वेंगुर्लेकर यांनी दिली आहे.