व्यापारी एकता मेळाव्याला जाहीर पाठिंबा…
मसुरे | प्राजक्ता पेडणेकर : सिंधुदुर्ग जिल्हा व्यापारी महासंघ आयोजित ३१ जानेवारी रोजीच्या व्यापारी एकता मेळाव्यास सिंधुदुर्ग इलेक्ट्रॉनिक्स डिलर्स असोसिएशनने
जाहीर पाठींबा दिला आहे.
व्यापारी वर्गाच्या विविध प्रश्नांना वाचा फोडून सिंधुदुर्ग मधील सर्व व्यापारी बंधूना एकत्रित ठेवण्याचे चांगले काम ही संघटना करीत आहे. सिंधुदुर्ग डीलर्स असोसिएशनचा स्थानिक व्यापारी बंधूच्या न्याय हक्कासाठी झगडणाऱ्या सर्व संघटनाना कायमच पाठिंबा असतो. परंतु मेळाव्या दिवशी व्यवसाय बंद ठेऊन सहभागी व्हा या आवाहनाला सिंधुदुर्ग इलेक्ट्रॉनिक्स डीलर्स असोसिएशनचा विरोध राहणार आहे. दोन वर्षात कोरोना महामारीमुळे आमच्या इलेक्ट्रॉनिक क्षेत्रातील बहुतांश व्यापाऱ्यांचे फारच आर्थिक नुकसान झाले आहे. अशा परिस्थितीमध्ये व्यवसाय बंद ठेवणे हे अयोग्य वाटते. तसेच सदर मेळावा हा व्हर्च्युअल (ऑनलाईन) पद्धतीने असल्याने व्यवसाय चालू ठेवूनही मेळाव्यात सहभागी होता येणार आहे. त्यामुळे इलेक्ट्रॉनिक्स साहित्य पुरवणारी आमची सर्व दुकाने सुरु राहुन ऑनलाईन लिंक वर जॉईन होऊन आमचे सर्व व्यापारी आपली बहुमूल्य उपस्थिती सिंधुदुर्ग व्यापारी महासंघ आयोजित व्यापारी एकता मेळाव्यास दर्शवतील अशी माहिती सिंधुदुर्ग इलेक्ट्रॉनिक्स डिलर्स असोसिएशनचे अध्यक्ष राजन राणे यांनी दिली आहे.
