भुईबावडा घाटाची केली पाहणी…!
कणकवली | उमेश परब : तळकोकण व पश्‍चिम महाराष्ट्राला जोडणारा भुईबावडा हा महत्त्वाचा घाट मार्ग आहे. मात्र, गेल्या काही वर्षांमध्ये पावसाळ्यात या घाटमार्गावर रस्ता खचणे व दरड पडण्याचे प्रकार वाढले आहेत. अतिवृष्टीमुळे रस्ते खचण्याच्या घटना भविष्यात घडू नयेत. म्हणून त्याचा मास्टर प्लॅन तयार करा, अशा सूचना कोल्हापूरचे पालकमंत्री सतेज पाटील यांनी संबंधित अधिकार्‍यांना दिल्या. मंत्री पाटील यांनी शनिवारी भुईबावडा घाटाची प्रत्यक्ष पाहणी केली. रस्ता खचण्याच्या घटना घडत असल्याने रस्त्याच्या बाजूने सुरक्षा कठडे, काँक्रिटीकरण करण्याबरोबरच रस्त्याचेही काँक्रिटीकरण करण्याच्या सूचना त्यांनी केल्या.
यावेळी करवीरचे उपविभागीय अधिकारी वैभव नावडकर, तहसीलदार संगमेश कोडे, वैभववाडी तहसीलदार रामदास झळके, वैभववाडी पोलीस निरीक्षक अतुल जाधव, सार्वजनिक बांधकाम विभाग उपअभियंता श्री. कुलकर्णी, माजी जिल्हा परिषद अध्यक्ष बजरंग पाटील, जिल्हा परिषद सदस्य भगवान पाटील, डी. वाय. पाटील साखर कारखान्याचे संचालक मानसिंग पाटील, उदय देसाई, गगनबावडा सभापती संगीता पाटील, गोकुळचे संचालक बयाजी शेळके, पंचायत समिती सदस्या मंगल कांबळे, पांडुरंग भोसले, सरपंच दगडू भोसले, सहदेव कांबळे, चंद्रकांत खानविलकर, संभाजी पाटणकर, सार्वजनिक बांधकाम अधिकारी सारिका कुलकर्णी-जाधव, विभागीय वन अधिकारी सुधीर सोनवणे, विभागाचे कार्यकारी अभियंता संजय काटकर, गगनबावडा पोलीस ठाण्याचे सहाय्यक पोलीस निरीक्षक रणजित पाटील, पी.डी.जाधव, बंडाआप्पा पडवळ, दादू पाटील आदी उपस्थित होते.
