मालवण | ब्यूरो न्यूज : सिंधुदुर्ग जिल्ह्यातील मालवण तालुक्यातल्या डिकवल बौद्धवाडी येथील सचिन सहदेव डिकवलकर (वय : ३८ वर्षे ) यांनी स्वतःवर ठासणीच्या बंदुकीने गोळी झाडून घेत काल रात्री ८ च्या आसपास आत्महत्या केल्याची घटना घडल्याने गांवात खळबळ उडाली. सूत्रांना मिळालेल्या प्राथमिक माहितीनुसार त्यांनी आर्थिक निराशेतून जीवन संपवणार आहोत अशी एका नातेवाईकाला फोनवरुन माहिती दिली होती असे समजते.
याबाबतची फिर्याद मयत सचिन डिकवलकर यांच्या भावाने पोलीस ठाण्यात दिली आहे. त्यानुसार पोलीस ठाण्यात आकस्मिक मृत्यू म्हणून नोंद करण्यात आली आहे. या घटनेची माहिती मिळताच मालवण पोलीस निरीक्षक प्रवीण कोल्हे, सहायक पोलिस निरीक्षक सुनील जाधव, कट्टा पोलीस दूरक्षेत्राचे प्रकाश मोरे, सिद्धू चिपकर यांनी घटनास्थळी भेट देत माहिती घेतली. या घटनेची माहिती सचिन यांच्या भावाने पोलीस ठाण्यात दिली असून आकस्मिक मृत्यू म्हणून नोंद करण्यात आली आहे. अधिक तपास पोलीस निरीक्षक प्रवीण कोल्हे यांच्या मार्गदर्शनाखाली सहाय्यक पोलिस निरीक्षक सुनील जाधव करत आहेत.