नवलराज काळे | सहसंपादक : सिंधुदुर्ग जिल्ह्यातील सावंतवाडी तालुक्यातल्या ओवळीये धनगरवाडी येथील भगवान वाघू वरक (४२) यांचे आज बुधवारी सकाळी हृदयविकाराच्या तीव्र धक्क्याने निधन झाले. भगवान वरक यांना सकाळी अचानक अस्वस्थ वाटू लागल्यानंतर त्यांना उपचारासाठी सुरुवातीला सावंतवाडीत त्यानंतर अधिक उपचारासाठी कुडाळ येथे नेत असताना त्यांचे हृदयविकाराच्या तीव्र धक्क्याने निधन झाले. भगवान वरक यांच्या आकस्मित निधनाचा वरक कुटुंबीयांसह सर्वांनाच धक्का बसला. त्यांच्या निधनाचे वृत्त समजताच ओवळीये गावावर शोककळा पसरली.
आज सायंकाळी शोकाकुल वातावरणात अंत्यसंस्कार करण्यात आले. त्यांच्या पश्चात पत्नी, एक मुलगा, तीन मुली, आई, दोन भाऊ, बहिणी, भावजय, पुतणे असा परिवार आहे. आरोस -कोंडुरा हायस्कूलचे शिक्षक तानाजी वरक तसेच पाडलोस प्राथमिक शाळेचे शिक्षक अनिल वरक यांचे ते बंधू होत.
