मालवण | नझ़िरा शेख़ : सिंधुदुर्ग जिल्ह्यातील मालवण शहरातल्या रोझरी इंग्लिश स्कूल या प्रशालेत ७६ वा स्वातंत्र्य दिन सोहळा संपन्न झाला. या सोहळ्याचे प्रमुख पाहुणे माजी नौदल अधिकारी श्री. राजेंद्र शिवराम वराडकर यांच्या हस्ते ध्वजारोहण करुन भारतीय तिरंगी झेंड्याला सलामी देण्यात आली. या सोहळ्यात विविध सांस्कृतिक कार्यक्रम व राष्ट्रगीत तसेच राज्यगीताचे सादरीकरण करण्यात आले.
इयत्ता ३ री व ८ वी इयत्तेच्या विद्यार्थ्यांनी देशभक्तीपर गाण्यांवर नृत्य सादर केले. या संपूर्ण कार्यक्रमाचे सूत्रसंचालन सहशिक्षिका डायना डिसोज़ा यांनी केले तर आभार प्रदर्शन सहशिक्षिका पेर्पेच्युअल फर्नांडिस यांनी केले. या संपूर्ण कार्यक्रमासाठी शाळेचे मुख्याध्यापक फादर ऑल्विन यांचे मार्गदर्शन लाभले. या कार्यक्रमाला सर्व शिक्षक व शिक्षकेतर कर्मचारी तसेच पालक मोठ्या संख्येने उपस्थित होते.
