सिंधुदुर्ग जिल्ह्यातील विद्युतपुरवठ्या संदर्भात निवेदन.
विवेक परब | एडिटोरिअल असिस्टंट : सिंधुदुर्ग जिल्ह्याला कणकवली तालुक्यातल्या खारेपाटण येथील २२० / १३२ के. व्ही. तसेच सावंतवाडी तालुक्यातील इन्सुली येथील २२० / १३२ के.व्ही.च्या अति उच्चदाब केंद्रातून विद्युत पुरवठा होत आहे. दिनांक २२ सप्टेंबर २०२२ रोजी खारेपाटण येथील अतिउच्च दाबाच्या उपकेंद्रातील ट्रान्सफॉर्मरला लागलेल्या आगीमुळे मालवण, कुंभारमाठ, पेंडूर, आचरा, तळेबाजार, जामसंडे, देवगड, वाडा, वैभववाडी, खारेपाटण येथील ३३/११ के. व्ही. वरील वीज पुरवठा बाधित झाला होता. त्यामुळे सुमारे १,२०,००० ग्राहकांना अंधारात राहण्याची वेळ आली.
सिंधुदुर्ग जिल्ह्याला विद्युत पुरवठा करणाऱ्या इन्सुली व खारेपाटण या दोन अति उच्चदाब केंद्रांपैकी एखाद्या केंद्रात भविष्यात अशा प्रकारचा बिघाड निर्माण झाल्यास दुसऱ्या केंद्रातून विद्युत पुरवठा करण्याची पर्यायी व्यवस्था निर्माण झाल्यास ग्राहकांची गैरसोय होणार नाही. सिंधुदुर्ग जिल्हा हा पर्यटन जिल्हा असल्याने येथे २४ तास सुरळीत विद्युत पुरवठा सुरू असणे अत्यंत गरजेचे आहे. यासाठी आपल्या स्तरावरून त्वरीत कार्यवाही करण्यात यावी, त्याचप्रमाणे खारेपाटण येथील महापारेषणचे विज उपकेंद्र आगीमुळे नादुरूस्त झाल्याने त्याचे दुरूस्तीसाठी आवश्यक निधीची उपलब्धता त्वरीत करून देण्यात यावी असे निवेदन आम. नितेश राणेंनी उपमुख्यमंत्री देवेंद्र फडणवीस यांना दिले आहे.
