मालवणात रिक्षा व्यावसायिक बांधवांचा गरजू महिला रुग्णाच्या शस्त्रक्रियेसाठी आर्थिक हातभार.

मालवण | प्रतिनिधी : सिंधुदुर्ग जिल्ह्यातील मालवणात जवळपास ७८ रिक्षा चालकांनी दांडी येथील एका गरजू महिला रुग्णाला तिच्या शस्त्रक्रियेसाठी २२ हजार २०० रुपये जमवत आर्थिक मदतीचा हातभार लावला आहे. सौ. रविना रविंद्र रेवंडकर असे त्या ४५ वर्षीय गरजू महिला रुग्णाचे नाव असून तिचे पती रविंद्र रेवंडकर यांनी या संदर्भात मदतीची याचना करून विविध माध्यमांतून आवाहन केले होते. या आवाहनाला रिक्षा व्यावसायिक बांधवांनी दिलेल्या प्रतिसादाबद्दल रिक्षा व्यावसायिक निलेश लुडबे यांनी विशेष समाधान व्यक्त केले आहे. या मदतीच्या वेळी रिक्षा व्यावसायिक बांधव निलेश लुडबे यांच्यासह ज्येष्ठ रिक्षा व्यावसायिक पप्पू कद्रेकर, बाबू हडकर, गणेश लुडबे, जयेंद्र उर्फ नानू सावजी, प्रवीण उर्फ मुन्ना मिठबावकर उपस्थित होते. 

सौ. रविना रविंद्र रेवंडकर व कुटुंबीय हे मोलमजुरीवर अवलंबून असतात. सौ. रविना ह्या गृहिणी असून त्यांच्या पोटात गाठ आहे आणि फुफ्फुसात पाणी झाले आहे तसेच त्या उपचारासाठी कणकवली येथे डाॅ. बिरमोळे यांच्याकडे २६ मे पासून दाखल आहेत. त्यांच्या शस्त्रक्रियेसाठी जवळपास '१ लाख ५० हजार' ( दिड लाख) रुपयांची आवश्यकता असल्याची माहिती रिक्षा व्यावसायिक निलेश लुडबे यांनी दिली आहे. या संदर्भात अधिक माहितीसाठी रिक्षा व्यावसायिक बांधव श्री. निलेश लुडबे यांच्याशी 9404737708 या क्रमांकावर संपर्क साधता येऊ शकतो.