शिवसेना जिल्हा संघटक माजी नगराध्यक्ष महेश कांदळगांवकर यांची माहिती.
मालवण | प्रतिनिधी : आमदार निलेश राणे यांच्या पाठपुराव्यानंतर मालवण मधील १०३ अपंग बांधवांच्या खात्यात अपंग निधी जमा झाला आहे. याबद्दल सिंधुदुर्ग दिव्यांग संघटनेचे अध्यक्ष सत्यम पाटील व सचिव दत्ता कामतेकर यांनी आमदार निलेश राणे यांची भेट घेत त्यांचे आभार मानले. यावेळी शिवसेना जिल्हाप्रमुख दत्ता सामंत, जिल्हा संघटक महेश कांदळगांवकर, कुडाळ मालवण विधानसभा प्रमुख बबन शिंदे उपस्थित होते. शिवसेना जिल्हा संघटक माजी नगराध्यक्ष महेश कांदळगांवकर यांनी प्रसिद्धी पत्राद्वारे ही माहिती दिली.
शिवसेना जिल्हा संघटक तथा मालवणचे माजी नगराध्यक्ष महेश कांदळगांवकर यांनी दिलेल्या माहितीनुसार मालवण नगरपालिकेच्या एकूण उत्पन्नातून बांधिल खर्च वजा जाता येणाऱ्या उत्पन्नाच्या ५ % अपंग निधी वाटप केला जातो. अपंगाच्या कल्याणासाठी २०१५ मध्ये तसा शासननिर्णय करण्यात आला होता. त्यावेळी ३ % अपंग निधी वाटप केला जात होता . २०१८ मध्ये या शासन निर्णयात सुधारणा करून अपंग निधी ५% करण्यात आला होता. दरवर्षी चतुर्थी किंवा दिवाळी च्या दरम्यान या निधीच वाटप केले जात होते. परंतु गेल्या चतुर्थीला तो निधी वाटला गेला नव्हता. अपंग संस्थेने लेखी निवेदन देवूनही दिवाळीलाही या निधीचे वितरण करण्यात आले नव्हते. नंतर निवडणुक आचारसंहिता असल्याचे कारण देऊन निधी वाटप करण्यात आला नव्हता.
दिवाळीच्या दरम्यान आचारसहिता लागणार याची पूर्व कल्पना असूनही याबाबत कुठलीही आगाऊ कार्यवाही प्रशासनाकडून करण्यात आली नाही त्यामुळे ऐन दिवाळीत अपंग बांधवाना या निधी पासून वंचित रहावे लागले होते. शहराच्या विकास कामात अनास्था असणाऱ्या प्रशासकाकडून अपंगाच्या बाबतीतही हेळसांड करण्यात आली. या अपंग निधीबाबतची माहिती प्राप्त झाल्यावर शिवसेनेच्या वतीने माजी नगराध्यक्ष तसेच शिवसेना जिल्हा संघटक महेश कांदळगांवकर यांनी निधीसाठी वंचित असलेल्या अपंगांना घेऊन आमदार निलेश राणे यांची भेट घेत त्यांना निवेदन देवून त्यांच्या ही बाब निदर्शनास आणून दिली होती. त्यावेळी आमदार निलेशजी राणे यांनी आचारसहिता संपताच लगेच हा निधी वितरित करण्याबाबत प्रशासनाला सूचना करुन निधी वितरीत केला जाईल या बाबत आश्वासित केले होते. आचारसंहिता संपताच आमदार निलेश राणे यांच्या पाठपुव्यानंतर मालवण शहरातील १०३ अपंगांच्या खात्यात निधी जमा करण्यात आला आहे अशी माहिती शिवसेना जिल्हा संघटक माजी नगराध्यक्ष महेश कांदळगांवकर यांनी दिली आहे.
