आमदार वैभव नाईक यांनी स्पष्ट व प्रांजळ स्वरुपात मांडली भूमिका
मालवण | वैभव माणगांवकर: मालवण-कुडाळ तालुक्यातील अनेक रस्ते खड्डेमय बनले आहेत. ही वस्तुस्थिती आहे. खड्डेमय रस्त्यांमुळे जनता व वाहन चालक यांना त्रास होत आहे. राजकीय आरोपही केले जात आहेत. मात्र रस्त्यांची जबाबदारी माझीच आहे असे प्रांजळ मत आमदार वैभव नाईक यांनी स्पष्ट केले आहे. हे रस्ते मे, जून महिन्यातच मंजूर करण्यात आले आहेत. पावसाळा असल्यामुळे रस्त्यांची कामे सुरू झाली नाहीत. मात्र दसऱ्या नंतर रस्त्यांच्या कामाला सुरुवात केली जाईल. चौके कुडाळ, कांदळगाव मसुरे या प्रमुख रस्त्यांसह तालुक्यातील ९ रस्त्यांच्या कामांना मंजुरी मिळाली आहे. तर कुडाळ तालुक्यातील १४ रस्ते कामांना मंजुरी मिळाली आहे. अशी माहिती आमदार वैभव नाईक यांनी मालवण शिवसेना शाखा येथे आयोजित पत्रकार परिषदेत दिली.सार्वजनिक बांधकाम विभागाच्या अखत्यारीत गेल्या दोन वर्षांत झालेल्या कामांपैकी १०० कोटींचे बिले ठेकेदारांची देणे आहेत. यासाठी बांधकाम मंत्री व अर्थ मंत्री यांच्याकडे पाठपुरावा सुरू असून लवकरच निधी मंजूर होईल अशी माहिती आमदार वैभव नाईक यांनी दिली.
यावेळी तालुकाप्रमुख हरी खोबरेकर, नगराध्यक्ष महेश कांदळगावकर, उपतालुकप्रमुख गणेश कुडाळकर, बांधकाम सभापती मंदार केणी, नगरसेविका सेजल परब, पंकज सादये, तपस्वी मयेकर, उमेश मांजरेकर यासह अन्य उपस्थित होते.
