खासदार विनायक राऊत यांना उपरकर यांचा टोला
कणकवली | उमेश परब : मातोश्रीच्या परवानगीशिवाय खासदार विनायक राऊत यांनी केंद्रीय उद्योगमंत्री राणेंना स्व. बाळासाहेबांच्या स्मृतिस्थळी शिवसैनिक जाऊ देणार नाही असे वक्तव्य केले. जणू काही मीच मातोश्रीचा दूत असे भासविण्याचा खासदार राऊत यांनी केविलवाणा प्रयत्न केला. भाजपा आमदार नितेश राणे आपले मित्र आहेत असे जगजाहीर पणे सांगल्यामुळे स्वतःच्या इमेजचे डॅमेज कंट्रोल चा हा राऊत यांचा प्रयत्न होता. पण बुंद से गयी वो हौद से आती नही असा टोला मनसे सरचिटणीस परशुराम उपरकर यांनी खासदार राऊत याना लगावला. नितेश राणेंना मित्र म्हटल्यानंतर खासदार राऊत यांचा पूर्वेतिहास कट्टर शिवसैनिकांनीच सोशल मिडियाद्वारे उघड केला. खासदार राऊत स्वतः सिंधुदुर्गात आणि राणेंना अडवणार मुंबईत असे वक्तव्य करून शिवसैनिकांना वाऱ्यावर सोडण्याचा राऊत यांचा प्रयत्न होता. जेव्हा उमेश कोरगावकरचे पाय तुटले, वेंगुर्लेत झालेला राडा असू दे किंवा राणेंशी शिवसेनेचा अन्य ठिकाणी झालेला आमनेसामने असो..खासदार राऊत हे नेहमीच लपून राहिले. यापूर्वी शिवसेना पक्षप्रमुख उद्धव ठाकरे आणि नारायण राणे यांनीही सिंधुदुर्गात जाहीर कार्यक्रमात एकेमकांचा उल्लेख सन्माननीय असा केला होता. पण मित्र म्हणून कधीच उल्लेख केला नाही. वेंगुर्लेतील कार्यक्रमात खासदार राऊत यांनी एकदा नव्हे तर दोन वेळा नितेश राणेंचा उल्लेख स्वतःचे मित्र म्हणून केला. एकीकडे नारायण राणेंशी टक्कर देणारा मी एकटाच अशी डरकाळी फोडायची आणि दुसरीकडे त्यांचा मुलगा नितेशला मित्र म्हणायचे हा दुटप्पीपणा शिवसैनिकांना रुचलेला नाही, असे उपरकर यावेळी म्हणाले. यावेळी मनसे उपजिल्हाध्यक्ष दया मेस्त्री, तालुकाध्यक्ष दत्ता बिडवाडकर, दत्ताराम अमृते, शरद सावंत संतोष कुडाळकर आदी उपस्थित होते.
